काठमाडौं । प्रतिनिधिसभाको बुधबार बस्ने बैठकमा सभामुख डोलप्रसाद (डीपी) अर्यालले रसुवाको भोटेकोसी नदीमा आएको भीषण बाढीबाट उत्पन्न महाविपत्तिबारे विशेष प्रस्ताव राख्ने भएका छन् ।
मंगलबार बसेको प्रतिनिधिसभाको कार्यव्यवस्था परामर्श समितिको बैठकले बुधबार दिउँसो १ बजे सभामुखले विशेष प्रस्ताव पेस गर्ने सहमति गरेको हो ।
उक्त प्रस्तावमाथि प्रतिनिधिसभामा प्रतिनिधित्व गर्ने ६ दलका तर्फबाट एक/एक जना सांसदले धारणा राख्ने सहमति भएको राष्ट्रिय स्वतन्त्र पार्टी (रास्वपा)का सचेतक प्रकाशचन्द्र परियारले जानकारी दिए ।
प्रतिनिधिसभाको बैठक बिहीबार पनि बस्नेछ । त्यसपछि लगातार तीन दिन सार्वजनिक बिदा पर्ने भएकाले सदनको नियमित कामकारबाही प्रभावित हुनेछ ।
परियारका अनुसार सरकारले भदौ २२ गते भोटेकोसी बाढीबाट भएको विनाशप्रति राष्ट्रिय शोक घोषणा गर्ने तयारी गरेको छ । भदौ २३ गतेदेखि भने प्रतिनिधिसभामा नियमित कार्यसूची अघि बढाउने गरी छलफल भइरहेको छ।
प्रकाशित मिति: मंगलबार, भदौ १६, २०८३
