काठमाडौं । भारतको चालु आर्थिक वर्ष २०२६–२७ को पहिलो त्रैमासिक (अप्रिल–जुन) मा वास्तविक कुल गार्हस्थ्य उत्पादन (जीडीपी) ७.८ प्रतिशतले वृद्धि भएको छ ।
भारतीय रिजर्भ बैंक (आरबीआई) ले यस अवधिमा ७ प्रतिशत आर्थिक वृद्धि हुने अनुमान गरेको थियो । तर भारतीय अर्थतन्त्रले अनुमानभन्दा राम्रो प्रदर्शन गरेको हो ।
भारतको तथ्यांक तथा कार्यक्रम कार्यान्वयन मन्त्रालयका अनुसार पहिलो त्रैमासिकमा भारतको जीडीपी करिब ८१.३६ लाख करोड भारतीय रुपैयाँ पुगेको छ । अघिल्लो आर्थिक वर्षको सोही अवधिमा यो करिब ७५.४६ लाख करोड रुपैयाँ थियो ।
विश्वव्यापी आर्थिक अनिश्चितता, इन्धनको मूल्य वृद्धि तथा आपूर्ति शृंखलामा देखिएका समस्याबीच पनि भारतले बलियो आर्थिक वृद्धि हासिल गरेको बताइएको छ ।
प्रधानमन्त्री नरेन्द्र मोदीले ७.८ प्रतिशतको वृद्धिलाई ठूलो उपलब्धि भन्दै भारतीय नागरिकहरूको सामूहिक प्रयासबाट यो सम्भव भएको बताएका छन् ।
तर प्रमुख विपक्षी दल कांग्रेसले भने जीडीपी वृद्धिको उक्त तथ्यांकलाई ‘अर्थतन्त्रको अत्यधिक विकृत चित्र’ भन्दै आलोचना गरेको छ।
प्रकाशित मिति: मंगलबार, भदौ १६, २०८३
