काठमाडौं । राष्ट्रिय स्वतन्त्र नागरिक समाज, नेपालले देशका विभिन्न क्षेत्रमा आएको विनाशकारी बाढी तथा पहिरोबाट प्रभावित नागरिकको तत्काल खोजी, उद्धार तथा राहतमा जुट्न सरकार, सुरक्षा निकाय र आम नागरिकलाई अपिल गरेको छ।
समाजका महासचिव प्रविन नेपालले जारी गरेको अपिलमा विशेषगरी रसुवा, नुवाकोट, धादिङ र गोरखातर्फ त्रिशूली नदीको बहाव चितवन, नवलपरासीलगायत तल्लो तटीय क्षेत्रमा पुग्ने भएकाले नदीको बहावसँगै बेपत्ता नागरिकका शव तथा धनमालसमेत बगेर जान सक्ने अवस्थालाई गम्भीरतापूर्वक लिन आग्रह गरिएको छ।
समाजले बेपत्ता नागरिकको तत्काल खोजी तथा उद्धार, नदी तटीय क्षेत्रमा विशेष निगरानी बढाउन र फेला परेका शवको पहिचान गरी सम्मानपूर्वक व्यवस्थापन गर्न नेपाली सेना, नेपाल प्रहरी, सशस्त्र प्रहरी बल, स्थानीय प्रशासन, स्थानीय तह, स्वयंसेवक तथा सम्पूर्ण नागरिक समाजलाई आग्रह गरेको छ।
त्यस्तै, बाढी तथा पहिरोबाट प्रभावित वास्तविक पीडित तथा क्षतिग्रस्त परिवारको तत्काल पहिचान गरी राहत, खाद्यान्न, औषधि, अस्थायी आवास तथा आवश्यक मानवीय सहयोग छिटोछरितो उपलब्ध गराउन संघ, प्रदेश र स्थानीय सरकारसमक्ष अपिल गरिएको छ।
राहत वितरणमा कुनै पनि प्रकारको राजनीतिक, व्यक्तिगत वा पहुँचका आधारमा विभेद नगरी वास्तविक पीडितलाई प्राथमिकताका आधारमा राहत उपलब्ध गराउन तथा वितरण प्रक्रियालाई पारदर्शी र प्रभावकारी बनाउन समाजले जोड दिएको छ।
मानवीय क्षति र राष्ट्रिय विपत्तिको अवस्थालाई मध्यनजर गर्दै सरकारले राष्ट्रिय शोक मनाउने निर्णय गर्नुपर्ने र अत्यधिक प्रभावित क्षेत्रलाई आवश्यकताअनुसार ‘संकटग्रस्त क्षेत्र’ घोषणा गरी विशेष उद्धार, राहत तथा पुनःस्थापनाका कार्यक्रम सञ्चालन गर्नुपर्ने मागसमेत समाजले गरेको छ।
समाजले विपत्तिको यस दुःखद् घडीमा सरकार, सुरक्षा निकाय, नागरिक समाज, सामाजिक संघ–संस्था, निजी क्षेत्र तथा आम नेपाली नागरिक एकजुट भएर ‘पहिले मानव जीवनको रक्षा, त्यसपछि राहत र पुनःस्थापना’ भन्ने भावनाका साथ अघि बढ्नुपर्ने जनाएको छ।
अपिलमा बेपत्ताको खोजी र पीडितको उद्धार, वास्तविक पीडितलाई तत्काल राहत तथा राष्ट्रिय विपत्तिमा सम्पूर्ण नेपाली एकजुट हुनुपर्नेमा जोड दिइएको छ।
