रसुवाको भोटेकोशी नदीमा आएको विनाशकारी बाढीका कारण देशका विभिन्न जिल्लामा ठूलो जनधनको क्षति भएकाले पूर्वघोषित आन्दोलनका कार्यक्रम फिर्ता लिइएको कमन जेनजी नेपालका अध्यक्ष विकेश साहले जानकारी दिएका छन्।
साहले जारी गरेको विज्ञप्तिमा देश शोकमा रहेका बेला आन्दोलनभन्दा बाढी प्रभावितको उद्धार, राहत तथा पुनःस्थापनामा जुट्ने निर्णय गरिएको उल्लेख छ।
यसअघि कमन जेनजी नेपालले जेनजी आन्दोलनको एक वर्ष पूरा भएको अवसरमा भदौ २३ गते ‘फेक शासनविरुद्ध असल शासन’ नारासहित देशव्यापी प्रदर्शन तथा सडक आन्दोलन गर्ने घोषणा गरेको थियो।
बाढीपछि अध्यक्ष साहसहित जेनजी युवाहरू नुवाकोटका विभिन्न प्रभावित क्षेत्रमा पुगेर उद्धार तथा राहतमा सहभागी भएका थिए। साहले प्रभावित नागरिकको उद्धार र राहतमा सरकारको काम अझ प्रभावकारी हुनुपर्ने बताएका छन्।
उनले प्रधानमन्त्री वालेन्द्र शाहलाई सामाजिक सञ्जालमार्फत मात्र अवस्थाबारे जानकारी गराउनेभन्दा प्रभावित क्षेत्रमा प्रत्यक्ष पुगेर नागरिकलाई सरकारको अनुभूति दिलाउन आग्रह गरेका छन्। प्रधानमन्त्री नुवाकोटको विदुर पुगे पनि रसुवा, धादिङ र चितवनलगायतका प्रभावित क्षेत्रमा पुग्नुपर्ने उनको भनाइ छ।
साहले जलविद्युत् आयोजनाका सुरुङमा फसेका नागरिकको तत्काल उद्धार गर्न सरकारलाई सम्पूर्ण शक्ति परिचालन गर्न आग्रह गरेका छन्। आवश्यक परे भारत, चीन, कोरियालगायतका देशबाट विषयविज्ञ र प्राविधिक सहयोग लिनुपर्ने उनले बताएका छन्।
कमन जेनजी नेपालले बाढीमा ज्यान गुमाएकाप्रति श्रद्धाञ्जली व्यक्त गर्दै शोकसन्तप्त परिवारप्रति समवेदना प्रकट गरेको छ। साथै बेपत्ता नागरिकको सकुशल उद्धारको कामना गर्दै खोज तथा उद्धारमा खटिएका नेपाली सेना, नेपाल प्रहरी र सशस्त्र प्रहरीलगायतका सुरक्षाकर्मीप्रति आभार व्यक्त गरेको छ।
