काठमाडौं । नेकपा एमालेका अध्यक्ष केपी शर्मा ओलीले रसुवामा बाढीबाट भएको क्षतिबाट हरेस नखाई जनजीवन सामान्य बनाउन जुट्नुपर्ने बताएका छन्।
बाढी प्रभावित क्षेत्रको अवस्थाबारे महासचिव शंकर पोखरेलले आइतबार बुझाएको प्रतिवेदन ग्रहण गर्दै ओलीले बाढी ठूलो चुनौती भए पनि त्यसको सामना गरेर परिस्थितिलाई सामान्य अवस्थामा फर्काउनुपर्ने बताए।
“हामीले हरेस खान हुँदैन। यो विशाल चुनौती हो। यसको सामना गरेर परिस्थितिलाई सामान्यीकरणमा ल्याउने,” ओलीले भने, “क्षति त भयो। अब जनजीवनलाई सामान्यीकरणमा ल्याउने प्रयासमा जुट्नुपर्दछ।”
उनले एमाले पार्टीका तर्फबाट उद्धार, राहत तथा पुनर्स्थापनाका काममा सक्रिय हुन निर्देशन दिए। वाग्मती प्रदेशको संयोजनमा केन्द्रीय कार्यालयलाई केन्द्र बनाएर काम गर्न पनि उनले निर्देशन दिएका छन्।
ओलीले नियमित औषधि सेवन गर्ने बिरामीलाई औषधि उपलब्ध गराउने तथा अस्पताल जानुपर्ने बिरामीलाई सुरक्षित रूपमा अस्पतालसम्म पुर्याउने विषयमा व्यवस्थित ढंगले काम गर्नुपर्ने बताए।
उनले प्रदेश र जिल्ला कमिटीलाई समेत परिचालन गरेर अघि बढ्न निर्देशन दिँदै बाढीपछिको परिस्थितिमा केन्द्र सरकार, प्रदेश सरकार र स्थानीय तहबीच प्रभावकारी समन्वय आवश्यक रहेको बताए।
प्रकाशित मिति: आइतबार, भदौ १४, २०८३
