हेटौँडा । भदौ १० गते भोटेकोसी नदीमा आएको विनाशकारी बाढीबाट प्रभावित क्षेत्रमा वाग्मती प्रदेश सरकारले उद्धार, राहत तथा पुनर्निर्माणका कामलाई तीव्रता दिने भएको छ।
बाढी प्रभावित नागरिकलाई तत्काल राहत उपलब्ध गराउनेदेखि क्षतिग्रस्त पूर्वाधार पुनर्निर्माणसम्मका विषयमा छलफल गर्न आइतबार मुख्यमन्त्री किरण थापामगरको अध्यक्षतामा सर्वदलीय बैठक बसेको थियो।
बैठकले विपद्पछिको अवस्थालाई सम्बोधन गर्न प्रदेश सरकार, राजनीतिक दल तथा सम्बन्धित निकायबीच समन्वय गरी तत्कालीन र दीर्घकालीन योजना अघि बढाउने निर्णय गरेको छ।
बैठकमा प्रदेश सरकारका पूर्वमुख्यमन्त्रीहरू राजेन्द्र पाण्डे, शालिकराम जम्कट्टेल र बहादुरसिंह लामासहित विभिन्न राजनीतिक दलका संसदीय दलका नेताहरू सहभागी थिए।
बैठकले बाढीबाट अत्यधिक प्रभावित रसुवा, नुवाकोट, धादिङ र चितवनमा अस्थायी आवास, उद्धार तथा राहत वितरणलाई अवरोधबिना निरन्तरता दिने निर्णय गरेको छ।
यस्तै, अवरुद्ध सडक तथा वैकल्पिक मार्गको थप सम्भाव्यता अध्ययन गरी आवतजावत सहज बनाउन आवश्यक स्थानमा बेलीब्रिज, झोलुंगे पुल तथा तुइन निर्माणको प्रक्रिया तत्काल अघि बढाउने निर्णय भएको छ।
बैठकमा सहभागी नेताहरूले विपद्का बेला नागरिकको जीवनरक्षा र तत्काल राहतलाई पहिलो प्राथमिकतामा राखेर काम गर्नुपर्नेमा जोड दिएका थिए।
प्रकाशित मिति: आइतबार, भदौ १४, २०८३
