पोखरा । नेकपा एमालेबाट गण्डकी प्रदेश सरकारमा सहभागी चार जना मन्त्रीले राजीनामा दिएका छन्।
बुधबार बसेको एमाले संसदीय दलको बैठकले राजीनामा दिने निर्णय गरेपछि उनीहरूले मुख्यमन्त्री सुरेन्द्रराज पाण्डेलाई भेटेर राजीनामा बुझाएका हुन्। यसअघि मंगलबार बसेको संसदीय बोर्ड बैठकले मन्त्रीहरूलाई राजीनामा दिन निर्देशन दिएको थियो।
राजीनामा दिनेमा भौतिक पूर्वाधार तथा यातायात व्यवस्थामन्त्री गोविन्द नेपाली, भूमि व्यवस्था, कृषि तथा सहकारीमन्त्री भीम कार्की, उद्योग तथा पर्यटनमन्त्री यशोदा रिमाल र स्वास्थ्यमन्त्री लक्ष्मण पाण्डे छन्।
उनीहरू मन्त्रिपरिषद् हेरफेरका क्रममा गत वैशाख २ गते मन्त्री नियुक्त भएका थिए। सत्ता समीकरण परिवर्तन भएसँगै एमालेका मन्त्रीहरू कांग्रेस नेतृत्वको सरकारबाट बाहिरिएका हुन्। हाल गण्डकी प्रदेशमा एमाले–नेकपा समीकरण बनेको छ।
प्रकाशित मिति: बुधबार, भदौ १०, २०८३
