काठमाडौं । युक्रेनी ड्रोन आक्रमणमा रुसी ई–कमर्स कम्पनी ‘ओजोन’का चारवटा लजिस्टिक केन्द्र प्रभावित भएका छन् । कम्पनीले सोमबार दिएको जानकारीअनुसार अगस्ट २२ यता ड्रोन आक्रमणको निसाना बनेका ओजोनका गोदामको संख्या ६ पुगेको छ ।
ओजोनका अनुसार डागेस्तानको मखचकलास्थित गोदाममा ड्रोन आक्रमणपछि ठूलो आगलागी भएको थियो । प्रारम्भिक विवरणअनुसार घटनामा केही मानिस घाइते भएका छन् । यस्तै, क्रास्नोडार क्षेत्रको एनेम सहरमा रहेको गोदाममा पनि ठूलो आगलागी भएको कम्पनीले जनाएको छ ।
अदिगेया क्षेत्रको अदिगेयस्क र स्टाभ्रोपोल क्षेत्रको नेभिन्नोमिस्कमा रहेका गोदामबाट भने कर्मचारीलाई सुरक्षित रूपमा बाहिर निकालिएको थियो । कम्पनीका अनुसार ती केन्द्रमा रहेका सामान भने सुरक्षित छन् ।
यसअघि अगस्ट २२ मा समारा क्षेत्रस्थित ओजोनको एउटा लजिस्टिक केन्द्रमा ड्रोन आक्रमण भएको थियो भने अगस्ट २३ मा ओरेनबर्ग क्षेत्रस्थित अर्को लजिस्टिक केन्द्रसमेत ड्रोनको भग्नावशेषबाट प्रभावित भएको थियो ।
आक्रमणको खबर सार्वजनिक भएपछि मस्को एक्सचेन्जमा ओजोनको सेयर मूल्य १२ प्रतिशतसम्म घटेको छ । कम्पनीका प्रमुख सेयरधनी ‘एएफके सिस्तेमा’को सेयर मूल्यमा पनि करिब १३ प्रतिशतको गिरावट आएको छ ।
प्रकाशित मिति: सोमबार, भदौ ८, २०८३
-1787133994.jpg)
