इमरान खानको स्वास्थ्यबारे २१ पूर्वकप्तानले पाकिस्तानी प्रधानमन्त्रीलाई पत्र लेखे

विश्व

आजको न्युज सोमबार, भदौ ८, २०८३

काठमाडौं । पाकिस्तानका पूर्वप्रधानमन्त्री तथा पूर्वक्रिकेट कप्तान इमरान खानको स्वास्थ्यलाई लिएर क्रिकेट जगतका २१ जना पूर्वकप्तानले पाकिस्तानी प्रधानमन्त्री शहबाज शरीफलाई पत्र लेखेका छन् ।

पूर्वकप्तानहरूले प्रधानमन्त्री शहबाजलाई पत्र लेख्दै क्रिकेटरसमेत रहिसकेका पूर्वप्रधानमन्त्री इमरान खानलाई उचित स्वास्थ्य उपचार तथा आवश्यक चिकित्सा सुविधा उपलब्ध गराउन माग गरेका छन् ।

‘क्रिकइन्फो’का अनुसार पूर्वकप्तानहरूले पठाएको पत्रमा पाकिस्तानको सर्वोच्च अदालतले इमरान खानलाई अस्पताल लगेर मेडिकल बोर्डमार्फत स्वास्थ्य परीक्षण गराउन निर्देशन दिएको उल्लेख गरिएको छ ।

अदालतको आदेशअनुसार गठन हुने मेडिकल बोर्डमा इमरान खानका निजी चिकित्सकहरूका साथै उनकी बहिनी डा. उज्मा खानलाई समेत समावेश गर्नुपर्ने थियो । अदालतले इमरानको परिवारसँग साप्ताहिक भेटघाटको व्यवस्था पुनः सुरु गर्नसमेत आदेश दिएको थियो ।

तर, पूर्वकप्तानहरूले इमरानलाई अस्पतालमा केही घण्टामात्र राखिएको र अदालतको आदेशअनुसार गठन गरिएको मेडिकल बोर्डबाट नभई सरकारले नियुक्त गरेको टोलीबाट उनको स्वास्थ्य परीक्षण गरिएको दाबी गरेका छन् ।

उक्त टोलीले इमरानलाई ‘चिकित्सकीय रूपमा स्वस्थ’ घोषणा गर्दै पुनः अदियाला जेल पठाएको पूर्वकप्तानहरूको भनाइ छ ।

प्रधानमन्त्री शहबाजलाई पूर्वकप्तानहरूले पठाएको यो दोस्रो पत्र हो । यसअघि गत फेब्रुअरी १४ मा १४ जना पूर्वकप्तानले इमरानको स्वास्थ्यप्रति चिन्ता व्यक्त गर्दै प्रधानमन्त्रीलाई पत्र लेखेका थिए ।

त्यतिबेला इमरानको परिवारले आँखाको समस्याका कारण उनको एउटा आँखाको दृष्टि लगभग पूर्ण रूपमा गुमेको र जेलमा उचित उपचार नपाएको दाबी गरेको थियो ।