काठमाडौं । रुस र युक्रेनबीच जारी युद्धका क्रममा शनिबार भएका पछिल्ला हवाई आक्रमणमा कम्तीमा १० जनाको मृत्यु भएको छ।
युक्रेनमा रुसी ड्रोन तथा क्षेप्यास्त्र आक्रमणमा सातजनाको मृत्यु भएको छ भने रुसको क्रास्नोदार क्षेत्रमा युक्रेनी ड्रोन आक्रमणमा तीनजनाको ज्यान गएको छ। यसअघि शुक्रबार मध्य युक्रेनस्थित एक शपिङ सेन्टरमा भएको रुसी हमलामा १६ जनाको मृत्यु भएको थियो।
युक्रेनी राष्ट्रपति भोलोदिमिर जेलेन्स्कीका अनुसार रुसी सेनाले राजधानी किभमा रेल पूर्वाधार र लोकोमोटिभ डिपोलाई लक्षित गरी ब्यालिस्टिक क्षेप्यास्त्र प्रहार गरेको थियो। दिउँसो भएका अन्य आक्रमणसहित किभमा तीनजनाको मृत्यु भएको उनले बताएका छन्।
युक्रेनमा ब्यालिस्टिक क्षेप्यास्त्र रोक्न सक्ने अमेरिकी ‘प्याट्रियट’ एयर डिफेन्स इन्टरसेप्टरको अभाव भइरहेका बेला रुसले किभमाथिको आक्रमण तीव्र पारेको छ। यस्तै, जापोरिज्जिया क्षेत्रमा रुसी ड्रोन तथा क्षेप्यास्त्र आक्रमणमा चारजनाको मृत्यु भएको छ भने मिनीबसमा सवार यात्रुसहित १८ जना घाइते भएका छन्।
यसअघि जेलेन्स्कीको गृहनगर क्रिभी रिहस्थित शपिङ सेन्टरमा भएको रुसी ‘डबल–ट्याप’ ड्रोन आक्रमणमा मृत्यु हुनेको संख्या १६ पुगेको छ। घटनामा १३० भन्दा बढी मानिस घाइते भएका छन् भने चारजना अझै बेपत्ता छन्। उद्धारकर्मी घटनास्थलमा पुगेका बेला दोस्रोपटक आक्रमण गरिएको जेलेन्स्कीले बताएका छन्।
यसैबीच, युक्रेनले पनि रुसभित्र रहेका टाढाका इन्धन केन्द्रलाई लक्षित गर्दै लामो दूरीका ड्रोन आक्रमण तीव्र पारेको छ। रुसको दक्षिणी क्रास्नोदार क्षेत्रमा युक्रेनी ड्रोन आक्रमणमा दुई बालबालिकासहित तीनजनाको मृत्यु भएको बताइएको छ।
यस्तै, युद्धमोर्चाबाट करिब एक हजार किलोमिटर टाढा रहेको समारा क्षेत्रको नोवोकुइबिशेभ्स्क तेल प्रशोधन केन्द्रमा युक्रेनी ड्रोनले आक्रमण गर्दा ठूलो आगलागी भएको राष्ट्रपति जेलेन्स्कीले पुष्टि गरेका छन्।
प्रकाशित मिति: आइतबार, भदौ ७, २०८३
