काठमाडौं । रुसले युक्रेनमा गरेको पछिल्लो मिसाइल आक्रमणमा राजधानी किभ र आसपासका क्षेत्रमा कम्तीमा पाँचजनाको मृत्यु भएको छ भने २३ जना घाइते भएका छन् ।
युक्रेनको स्टेट इमर्जेन्सी सर्भिसका अनुसार रुसी आक्रमणमा भवन तथा गोदामलाई निशाना बनाइएको थियो । भग्नावशेषमा मानिस फसेको आशंकामा उद्धार तथा खोजी कार्य जारी छ ।
किभका मेयर भिताली क्लित्स्कोका अनुसार रातभर भएको आक्रमणबाट एउटा बाल अस्पतालमा समेत क्षति पुगेको छ । अस्पतालका झ्यालका सिसा फुटेका छन् भने आसपासका कैयौँ सवारीसाधनमा आगलागी भएको छ ।
आक्रमणपछि स्थानीय प्रशासनले बासिन्दालाई सुरक्षित स्थानमा जान आग्रह गर्दै हवाई आक्रमणको चेतावनी जारी गरेको थियो । सो क्षेत्रमा हवाई प्रतिरक्षा प्रणालीसमेत सक्रिय गरिएको जनाइएको छ ।
युक्रेनमाथि रुसी आक्रमण जारी रहेकै बेला पोल्यान्डले पनि आफ्नो हवाई क्षेत्रको सुरक्षाका लागि ‘सावधानीमूलक सैन्य विमान अभियान’ सुरु गर्ने घोषणा गरेको छ।
प्रकाशित मिति: बिहीबार, भदौ ४, २०८३
-1787133994.jpg)
