कैलाली । सुदूरपश्चिम प्रदेशका मुख्यमन्त्री खगराज भट्टले प्रदेशसभाबाट विश्वासको मत पाएका छन्। २९ गते मुख्यमन्त्रीमा नियुक्त भएका भट्टले बुधबार प्रदेशसभाबाट विश्वासको मत पाएका हुन्।
मुख्यमन्त्री भट्टको पक्षमा ३१ सांसदले मतदान गरेका छन्। उनको पक्षमा नेकपा एमालेका ११ र नेकपाका २० सांसदले मतदान गरेका हुन्।
नेकपाका तर्फबाट साविक माओवादी केन्द्रका सभामुखबाहेक १०, साविक नागरिक उन्मुक्ति पार्टीका ७ तथा साविक नेकपा एकीकृत समाजवादीका निलम्बित सांसदबाहेक ३ जनाले भट्टलाई विश्वासको मत दिएका हुन्।
विश्वासको मतको विपक्षमा नेपाली कांग्रेसका १७ र राष्ट्रिय प्रजातन्त्र पार्टी (राप्रपा) का एक सांसदले मतदान गरेका छन्।
५१ सदस्यीय सुदूरपश्चिम प्रदेशसभामा डडेल्धुराबाट निर्वाचित तारा जोशीले राजीनामा दिएर प्रतिनिधिसभा निर्वाचनमा होमिएका छन्।
त्यस्तै, कैलालीबाट निर्वाचित प्रकाश देउवाको पद रिक्त रहेको छ भने कैलालीबाटै निर्वाचित अर्का सांसद दीर्घ सोडारी निलम्बनमा छन्।
प्रकाशित मिति: बुधबार, भदौ ३, २०८३
-1787131872.jpg)
