काठमाडौं । सार्वजनिक यातायातमा चोरी गरेको आरोपमा दुई जना पक्राउ परेका छन्।
पक्राउ पर्नेमा सोलुखुम्बुको काङ्गेलका ३१ वर्षीय अजय बस्नेत र झापाको दमक नगरपालिका–६ का ४३ वर्षीय भविन्द्र विक रहेका छन्। उनीहरूलाई काठमाडौं उपत्यका अपराध अनुसन्धान कार्यालयको टोलीले पक्राउ गरेको हो।
प्रहरीका अनुसार उनीहरूले गत साउन २७ गते पुरानो बसपार्कदेखि बिजुली बजारसम्म सार्वजनिक यातायातमा यात्रा गर्ने क्रममा एक यात्रुको गलामा लगाएको सुनको सिक्री चोरी गरी फरार भएका थिए।
पक्राउ परेका दुवै जनालाई आवश्यक कारबाहीका लागि प्रहरी वृत्त सिंहदरबार पठाइएको प्रहरीले जनाएको छ।
प्रकाशित मिति: मंगलबार, भदौ २, २०८३
