काठमाडौं । प्रधानमन्त्री बालेन्द्र शाह (बालेन)ले सांसदहरूलाई अभिव्यक्ति र विज्ञताको आधारमा तीन तहमा वर्गीकरण गर्दै आफ्नो धारणा राखेका छन् ।
मंगलबार इन्जिनियरिङ पृष्ठभूमिका १७ जना सांसदसँग छलफल गर्ने क्रममा प्रधानमन्त्री शाहले सांसदहरूलाई ‘एभरेज’, ‘एभरेजभन्दा तल’ र ‘एक्स्ट्रा अर्डिनरी’ गरी तीन तहमा विभाजन गरेका हुन् ।
प्रधानमन्त्रीले इन्जिनियर सांसदहरूलाई ‘एक्स्ट्रा अर्डिनरी’को रूपमा व्याख्या गर्दै उनीहरूबाट नयाँ विचार र सिर्जनात्मक सुझाव अपेक्षा गरेको बताएका छन् ।
‘इन्जिनियर भनेको एक्स्ट्रा अर्डिनरी हो । एभरेज मान्छेहरू इभेन्टको कुरा गर्छन् । त्योभन्दा तलकोले मलाई यो गर, त्यो गर भन्छन्,’ प्रधानमन्त्रीलाई उद्धृत गर्दै एक सांसदले बताए, ‘एक्स्ट्रा अर्डिनरी भएकोले तपाईंहरूले आइडिया र क्रियटिभिटीको कुरा उठाउनुपर्छ । यो गरे देश बन्छ भनेर । तपाईंहरूको आइडियाले देश बन्छ ।’
छलफलका क्रममा प्रधानमन्त्री शाहले औद्योगिकीकरणका लागि के गर्न सकिन्छ भन्नेबारे इन्जिनियरिङ पृष्ठभूमिका सांसदहरूलाई नयाँ आइडिया दिन आग्रह गरेका छन् ।
उनले संसद्मा उठेका विषयमा सम्बन्धित मन्त्रालय, मन्त्री तथा प्रधानमन्त्री तथा मन्त्रिपरिषद् कार्यालयसँग समन्वय गर्न सकिने बताए ।
‘केही आइडिया हुँदा प्रधानमन्त्री कार्यालयसँग सम्पर्क गर्न सकिन्छ । आइडिया हुनेहरूसँग सहजै भेट हुनेछ,’ उनले भने ।
प्रधानमन्त्री शाहले केही विधेयकसमेत ल्याउने तयारी भइरहेको जानकारी दिँदै त्यसमा सांसदहरूको सुझाव र सहयोग आवश्यक रहेको बताए ।
‘अब सांसदहरूको नै विधेयकमा इनपुट रहन्छ । देखेको र भोगेको आधारमा कानुन लिएर आउँछौं । यसमा तपाईंहरूको साथ र सहयोग चाहिन्छ,’ उनले भने ।
प्रकाशित मिति: बुधबार, असोज १४, २०८३
