काठमाडौं । नेपाली कांग्रेसको १५औँ महाधिवेशनअन्तर्गत प्रदेशसभा तथा प्रतिनिधिसभा क्षेत्रीय अधिवेशनको समयसीमा लम्बिने भएको छ। वर्षाका कारण यातायात र सुरक्षामा चुनौती देखिएपछि क्षेत्रीय अधिवेशन केही दिन पछि सार्न लागिएको हो।
कांग्रेस केन्द्रीय निर्वाचन समितिका अनुसार शुक्रबार (असोज ९) बिहानसम्म ६६ जिल्लाका ६३० पालिकामा अधिवेशन सम्पन्न भएको छ। तर, वर्षाका कारण अधिवेशन प्रक्रिया प्रभावित हुने भएपछि प्रदेशसभा तथा प्रतिनिधिसभा क्षेत्रीय अधिवेशन मौसमको अनुकूलता हेरेर केही दिन लम्ब्याउन सकिने समितिले जनाएको छ।
केन्द्रीय निर्वाचन समितिले सम्बन्धित जिल्ला तथा क्षेत्रका पार्टी कार्यसमितिसँग समन्वय गरी क्षेत्रीय अधिवेशन सम्पन्न गर्न निर्देशन दिएको छ।
कांग्रेसको कार्यतालिकाअनुसार शनिबार (असोज १०) प्रदेशसभा तथा प्रतिनिधिसभा क्षेत्रीय अधिवेशन गर्ने तय थियो। तर, प्रतिकूल मौसम भएका क्षेत्रमा असोज १३ गतेसम्म अधिवेशन सम्पन्न हुने गरी व्यवस्था मिलाउन भनिएको छ।
केन्द्रीय निर्वाचन समितिका सदस्यसचिव राजु कटुवालले शुक्रबारका लागि कुनै अधिवेशनको कार्यक्रम नरहेको बताए। शनिबारका लागि तय भएको क्षेत्रीय अधिवेशन वर्षाका कारण केही दिन लम्बिन सक्ने उनको भनाइ छ।
“आजको तालिकामा केही छैन। भोलिका लागि तोकिएको हो। हामीले सूचना जारी गरेका छौँ। कसैले ११ गते, कतै १२ र कतै १३ गते गर्ने कुरा भएको छ,” उनले भने, “काठमाडौंमा पनि ११ गते गर्ने कुरा भएको छ। बाहिर जिल्लामा पनि १२ र १३ गते हुँदै छन्।”
कटुवालका अनुसार प्रतिकूल मौसम रहेका क्षेत्रमा स्थानीय अवस्थाअनुसार अधिवेशनको मिति तय गर्न भनिएको छ।
कांग्रेसले असोज १६ देखि १९ गतेसम्म काठमाडौंमा १५औँ केन्द्रीय महाधिवेशन गर्दैछ।
असोज ३ गतेदेखि सुरु भएको वडा अधिवेशन सम्पन्न भइसकेको छ। पालिका तथा नगर अधिवेशन जारी रहेका बेला वर्षा सुरु भएपछि निर्धारित कार्यतालिकाअनुसार अधिवेशन सम्पन्न गर्न समस्या भएको निर्वाचन समितिले जनाएको छ।
प्रकाशित मिति: शुक्रबार, असोज ९, २०८३
