काठमाडौं । बंगालको खाडीमा बनेको न्यूनचापीय प्रणालीको प्रभाव नेपालमा देखिन थालेको छ । मनसुनी वायुसहित उक्त प्रणालीको प्रभावका कारण बुधबार (असोज ७) देशका विभिन्न भूभागमा वर्षा भइरहेको मौसम पूर्वानुमान महाशाखाले जनाएको छ ।
महाशाखाका मौसमविद् डेभिड ढकालका अनुसार न्यूनचापीय प्रणालीको आंशिक प्रभाव विशेषगरी वाग्मती प्रदेशदेखि पूर्वतिर देखिएको छ । गण्डकी प्रदेशमा भने यसको खासै प्रभाव देखिएको छैन ।
‘आंशिक प्रभाव देखिन थाल्यो । त्यसमा पनि विशेषगरी वाग्मती प्रदेशबाट पूर्वतिर,’ उनले बाह्रखरीसँग भने ।
हाल भइरहेको वर्षामा न्यूनचापीय प्रणालीसँगै मनसुनी वायुको समेत प्रभाव रहेको उनले बताए । वाग्मती प्रदेशमा बुधबार दिनभर वर्षाको सम्भावना रहे पनि निरन्तर वर्षा भने नहुने उनको भनाइ छ ।
काठमाडौंमा पनि दिनभरजसो वर्षाको सम्भावना रहे पनि बीचमा घाम लाग्न सक्ने उनले बताए ।
मधेस प्रदेशमा बुधबार बिहान बादल लागे पनि तत्काल ठूलो वर्षाको अवस्था नरहेको उनले जानकारी दिए ।
मौसमविद् ढकालका अनुसार न्यूनचापीय प्रणाली गहिरो न्यूनचापीय क्षेत्रमा विकास भइसकेको छ र क्रमशः जमिनको सतहतर्फ प्रवेश गरिरहेको छ । यो प्रणाली बुधबार बेलुका वा बिहीबारसम्म जमिनमा प्रवेश गर्ने सम्भावना रहेको उनले बताए ।
उनका अनुसार वर्षाको गतिविधि क्रमशः बढ्दै जानेछ । ‘भोलि, पर्सि अलिकति बढी हुन्छ जस्तो देखिन्छ । आजको भन्दा भोलि बढी, भोलिको भन्दा पर्सि बढी जस्तो देखिन्छ,’ उनले भने ।
यस अवधिमा हिमपातको समेत सम्भावना रहेको महाशाखाले जनाएको छ । पर्वतारोहणको वर्तमान यामलाई मध्यनजर गर्दै हिमपातको जोखिमका कारण रेड अलर्टसमेत जारी गरिएको मौसमविद् ढकालले बताए ।
प्रकाशित मिति: बुधबार, असोज ७, २०८३
-1787133994.jpg)