२२ माघ, काठमाडौँ । काठमाडौंमा क्रियाशील ६५ जना पत्रकारको शनिबार निःशुल्क मुटु परीक्षण गरिएको छ । प्रेस चौतारी नेपालको १९ औं स्थापना दिवसको अवसरमा ललितपुरमा आयोजना गरिएको शिविरमा पत्रकारहरुले मुटु परीक्षण गराएका हुन् ।
नेपाल हृदयरोग निवारण प्रतिष्ठानको सहयोगमा प्रेस चौतारी नेपाल र नेपाल हार्ट क्लिनिकले शिविर आयोजना गरेका थिए। शिविरमा इको, इसीजी, अल्ट्रासाउण्ड, लिपिट प्रोफाइल परीक्षण गरिएको स्वास्थ्य शिविर संयोजक प्रेस चौतारीका सचिव अमृतनाथ तिमल्सिनाले जानकारी दिए।
प्रतिष्ठानका अध्यक्ष बरिष्ठ मुटुरोग विशेषज्ञ डा.प्रकाशराज रेग्मी सहितको विशेषज्ञ टोलीले शिविरमा पत्रकारको मुटु परीक्षण गरेका थिए। हतार र अव्यवस्थित जीवनशैली र खानपानका कारण विग्रँदो स्वास्थ्य अवस्थालाई मध्यनजर गर्दै आम नागरिकसम्म स्वास्थ्य सम्वेदनशीलताको चेतना पुर्याउन पत्रकारको स्वास्थ्य परीक्षणमा सहयोग गरेको डा.रेग्मीले बताए । मुटु परीक्षण शिविरमा प्रेस चौतारी नेपालका पदाधिकारी, पूर्व अध्यक्ष र वरिष्ठ पत्रकारहरुले पनि मुटु परीक्षण गराएका थिए ।
प्रकाशित मिति: शुक्रबार, माघ २१, २०७३
