काठमाडौं । राष्ट्रिय स्वतन्त्र पार्टी (रास्वपा)का सांसद अमरेशकुमार सिंहले मधेसमा कुनै पनि किसिमको द्वन्द्व हुन नदिने बताएका छन् ।
आइतबार जनकपुरमा सञ्चारकर्मीसँग कुरा गर्दै उनले मधेसलाई जात, धर्म, भूगोल वा राजनीतिको नाममा विभाजित गरेर द्वन्द्वको मैदान बनाउन नहुने बताए ।
मधेस रास्वपाको राजनीतिक आधार क्षेत्र रहेको उल्लेख गर्दै सिंहले अबको राजनीति समाज जोड्ने, एकता कायम गर्ने र आर्थिक समृद्धितर्फ केन्द्रित हुनुपर्ने बताए ।
मधेस र कोसी प्रदेशलाई ‘ब्याटल ग्राउन्ड’ बनाउन देशभित्र र बाहिरका विभिन्न शक्ति सक्रिय रहेको दाबी गर्दै उनले त्यसबाट जोगाउनुपर्ने बताए ।
‘हाम्रो अहिलेको बाटो एकताको बाटो हुनुपर्छ, समृद्धिको बाटो हुनुपर्छ,’ उनले भने, ‘म कुनै पनि तरिकाको मधेसमा द्वन्द्व चाहन्नँ । मधेसलाई आउने दिनमा ब्याटल ग्राउन्ड बनाउन दिइँदैन ।’
सिंहले छठपछि मेची–महाकाली पदयात्रा गर्ने घोषणा पनि गरेका छन् । यात्राका क्रममा स्थानीयका समस्या सुन्ने उनले बताए ।
रास्वपाको राजनीतिक आधारमा मधेसको महत्त्वपूर्ण भूमिका रहेको दाबी गर्दै उनले मधेसले पार्टीलाई दिएको समर्थनअनुसार विकास र राजनीतिक सहभागितामा पनि प्राथमिकता पाउनुपर्ने बताए ।
मधेसबाट प्राप्त जनमतलाई सरकारले गम्भीर रूपमा बुझ्नुपर्ने र त्यसअनुसार मधेसको विकासमा ध्यान दिनुपर्ने सिंहको भनाइ छ ।
प्रकाशित मिति: आइतबार, असोज ४, २०८३
