काठमाडौं । प्रधानमन्त्री वालेन्द्र शाहले जेनजी उमेर समूहका सांसदहरूलाई स्वदेशमै रोजगारी तथा अवसर सिर्जना गर्न सक्रिय भूमिका खेल्न आग्रह गरेका छन्।
शुक्रबार प्रधानमन्त्री तथा मन्त्रिपरिषद्को कार्यालयमा जेनजी उमेर समूहका सांसदसँग भएको अन्तरक्रियामा प्रधानमन्त्री शाहले युवा पुस्ताका मुद्दालाई संसद्मा प्राथमिकताका साथ उठाउन आग्रह गरेका हुन्।
राष्ट्रिय स्वतन्त्र पार्टीका सांसद मनिष खनालका अनुसार प्रधानमन्त्रीले जेनजी सांसदहरूले डिजिटलाइजेसन, ई–गभर्नेन्स, आर्टिफिसियल इन्टेलिजेन्स, खेलकुद, कला तथा विदेशमा रहेका युवाका विषयलाई समेत संसद्को एजेन्डा बनाउनुपर्ने बताएका थिए।
प्रधानमन्त्रीले संसद्का गतिविधि आफूले नियमित रूपमा नियालिरहेको बताउँदै जेनजी सांसदहरूबाट नयाँ सोच र फरक एजेन्डाको अपेक्षा रहेको बताएका थिए।
रास्वपाका सांसद केपी खनालका अनुसार प्रधानमन्त्रीले जेनजी पुस्ताका सांसदसहित युवालाई उद्यमशीलतामा जोडिन र ‘साइड बिजनेस’मार्फत आत्मनिर्भर बन्न प्रोत्साहित गरेका थिए। छलफलमा स्टार्टअप तथा सूचना प्रविधि क्षेत्रका विषयसमेत उठेका थिए।
नेपालमा आईटी व्यवसाय दर्ता तथा सञ्चालनका लागि सहज वातावरण निर्माण गर्नुपर्ने विषय सांसदहरूले उठाएका थिए। प्रधानमन्त्रीले नेपालमै व्यवसाय दर्ता गर्ने वातावरण बनाउन सरकार तयार रहेको भन्दै समस्या आए सरकारसँग सुझाव तथा समन्वय गर्न आग्रह गरेको खनालले बताए।
जेनजी पुस्ताका युवालाई स्वदेशमै रोजगारी सिर्जना गर्ने वातावरण बनाउन सरकार प्रतिबद्ध रहेको प्रधानमन्त्रीले बताएका थिए। त्यसका लागि बैंकिङ कर्जा प्रक्रिया सहज बनाउने तथा नयाँ व्यवसायलाई प्रोत्साहन गर्ने विषयमा समेत छलफल भएको थियो।
छलफलमा जेनजी आन्दोलनका क्रममा पक्राउ परेका, घाइते तथा मृत्यु भएका व्यक्तिका विषयसमेत उठाइएको सांसदहरूले बताएका छन्।
खनालका अनुसार आन्दोलनमा संलग्न भएको आरोपमा पक्राउ परेकाहरूको मुद्दाबारे गृह मन्त्रालयअन्तर्गत अध्ययन समिति गठन भएको छ। समितिले मुद्दाहरूको वर्गीकरण गरी विद्यमान कानुनअनुसार फिर्ता लिन सकिने मुद्दाको प्रक्रिया अघि बढाउने विषयमा काम गरिरहेको उनले बताए। गम्भीर प्रकृतिका अपराध, हातहतियार, ज्यानसम्बन्धी कसुर तथा लुटपाटलगायत घटनामा संलग्न देखिएकाहरूको हकमा भने कानुनी प्रक्रिया कायम रहने उनको भनाइ छ।
विद्यालय तथा कक्षा १२ मा अध्ययनरत विद्यार्थी, विदेशमा रहेका युवा, खेलकुद तथा कला क्षेत्रमा रहेका युवालगायत समूहका समस्या र अपेक्षालाई संसद्को मूल एजेन्डा बनाउनुपर्ने प्रधानमन्त्रीको भनाइ रहेको खनालले बताए।
प्रधानमन्त्रीले सरकारका कामकारबाहीबारे रचनात्मक आलोचना तथा सुझाव दिनसमेत सांसदहरूलाई आग्रह गरेका थिए।
रास्वपा सांसद बब्लु गुप्ताका अनुसार प्रधानमन्त्रीले संसद्मा जेनजी सांसदहरूको गतिविधि र नयाँ विचारमा आफूले चासो राख्ने गरेको बताएका थिए।
प्रकाशित मिति: शुक्रबार, असोज २, २०८३
