काठमाडौं । शिक्षा तथा खेलकुदमन्त्री सस्मित पोखरेलले विद्यार्थी, शिक्षक, अभिभावक तथा स्थानीय समुदायबाट प्राप्त सुझावका आधारमा शिक्षा प्रणाली र पाठ्यक्रममा आवश्यक सुधार गरिने बताएका छन् ।
मधेस प्रदेशको भ्रमणका क्रममा सप्तरीका विभिन्न विद्यालयमा पुगेर प्रत्यक्ष संवाद गरेका मन्त्री पोखरेलले विद्यार्थीका सुझाव र गुनासो शिक्षा सुधारका लागि महत्त्वपूर्ण रहेको बताए ।
प्राप्त सुझावलाई समेटेर नयाँ पाठ्यक्रम निर्माणको प्रक्रिया अघि बढाइने उनको भनाइ छ । काठमाडौंमा बन्द कोठामा बसेर मात्र पाठ्यक्रम निर्माण गर्ने अभ्यास अन्त्य गर्नुपर्ने उनले बताए ।
“विद्यार्थी भाइबहिनीले दिएका सुझाव र गुनासो अत्यन्तै मार्मिक छन्,” उनले भने, “उहाँहरूले दिएका सुझावलाई सम्बोधन गरेर अहिलेको पाठ्यक्रममा आवश्यक परिवर्तन गरी नयाँ पाठ्यक्रम निर्माण गर्ने दिशामा अघि बढ्छौँ ।”
भदौ २६ गते धनुषाबाट सुरु भएको मन्त्रीसहितको टोलीको मधेस यात्रा सप्तरीको महावीर माध्यमिक विद्यालय पुगेर सम्पन्न भएको हो । यात्राका क्रममा विद्यार्थी, शिक्षक, अभिभावक र स्थानीय समुदायसँग शिक्षा क्षेत्रका समस्या, आवश्यकता तथा सुधारका विषयमा सुझाव संकलन गरिएको थियो ।
कक्षाकोठादेखि समुदायसम्म पुगेर संकलन गरिएका सुझाव र अनुभवले आगामी शिक्षा ऐनलगायत कानुन तथा नयाँ राष्ट्रिय पाठ्यक्रम निर्माणमा महत्त्वपूर्ण आधार प्रदान गर्ने मन्त्री पोखरेलले बताए ।
मन्त्री पोखरेलले मधेसमा गुणस्तरीय इन्जिनियरिङ शिक्षाको आवश्यकता रहेको बताउँदै कृषि कलेज स्थापना पनि महत्वपूर्ण रहेको उल्लेख गरे ।
मधेस यात्रा सम्पन्न गरेपछि मन्त्रीसहितको टोली पूर्वाञ्चल विश्वविद्यालयको भ्रमणमा गएको छ । भ्रमणपछि टोली मंगलबार (भदौ ३०) काठमाडौं फर्कने कार्यक्रम रहेको छ ।
मन्त्री पोखरेलसँगै प्रतिनिधिसभा सदस्य सीताराम साह, डा. अकिता ठाकुर र शिक्षामन्त्रीका प्रमुख सल्लाहकार शैलेन्द्र झासहितको टोली भ्रमणमा सहभागी थियो ।
_nJCneh38vu-1789366512.webp)
