काठमाडौं । राष्ट्रिय स्वतन्त्र पार्टीकी सांसद डा. तोसिमा कार्कीले राज्यको सेवा नपाएकै कारण सप्तरीकी ‘बबिता’ले सडक पेटीमै शिशुलाई जन्म दिनुपरेको बताएकी छन्।
शुक्रबार प्रतिनिधिसभाको आकस्मिक समयमा बोल्दै सांसद कार्कीले राज्य खोज्दै अस्पताल पुगेकी बबितासम्म राज्यको सेवा पुग्न नसकेको बताइन्।
केही दिनअघि सप्तरीस्थित गजेन्द्रनारायण सिंह अस्पतालनजिकै सडक पेटीमा एक महिलाले शिशुलाई जन्म दिएकी थिइन्। उक्त घटनाप्रति गम्भीर अनुसन्धान आवश्यक रहेको कार्कीले बताइन्।
उनले भनिन्, ‘राज्य खोज्दै बबिता अस्पताल पुगिन्। तर, राज्यको सेवा बबितासम्म पुगेन। बबिताजस्ता हरेक गर्भवती महिलासम्म राज्य पुगोस्। चिन्ता नलिऊ, बबिता, म तिम्रो साथमा छु। तिमीलाई केही हुँदैन, राज्य तिम्रो साथमा छ भन्न सक्नुपर्छ।’
प्रसव व्यथाले थलिएकी गर्भवती महिला अस्पताल पुग्दा उनलाई भर्ना गर्ने जिम्मेवारी कसको हो भन्दै उनले प्रश्न गरिन्। अस्पतालले ‘हामीलाई जानकारी छैन’ भनेर मात्रै पन्छिन नमिल्ने उनको भनाइ थियो।
कार्कीले आमा सुरक्षा कार्यक्रम बच्चा जन्माउनुलाई मात्रै निःशुल्क बनाउने कार्यक्रम नभएको बताइन्। गर्भवती महिलालाई समग्र स्वास्थ्य सेवा उपलब्ध गराउनुपर्नेमा जोड दिँदै उनले अस्पताल पुगेका गर्भवती महिलालाई कुनै पनि बहानामा उपचारबाट वञ्चित गर्न नहुने बताइन्।
उनले आमा सुरक्षा कार्यक्रमलाई थप व्यवस्थित बनाउन स्वास्थ्य मन्त्रालयको ध्यानाकर्षणसमेत गराइन्।
प्रकाशित मिति: शुक्रबार, भदौ २६, २०८३
