काठमाडौं । राप्रपाबाट अलग भएको डा. धवलशम्शेर राणाको समूहले साउन २९ गते नयाँ राजनीतिक दल दर्ता गर्ने भएको छ। समूहले ‘जय नेपाल पार्टी’ नाममा निर्वाचन आयोगमा दल दर्ता गर्ने तयारी गरेको हो।
धवलशम्शेर समूहका नेता मुकुन्दश्याम गिरीले साउन २९ गते पार्टी दर्ता गर्ने तयारी भइरहेको जानकारी दिए। उनका अनुसार दुर्गा प्रसाईं पक्ष सहभागी भए पनि नभए पनि अब पार्टी दर्ताको प्रक्रिया नरोक्ने तयारी छ।
यसअघि धवलशम्शेर राणा र राजावादी व्यवसायी दुर्गा प्रसाईंको समूहबीच एकता गरेर नयाँ पार्टी गठन गर्ने घोषणा भएको थियो। प्रस्तावित संरचनाअनुसार राणा अध्यक्ष र प्रसाईं ‘सर्वोच्च नेता’ बन्ने सहमति भएको थियो। तर, पार्टी दर्ता नहुँदै दुई पक्षबीच वरीयता र अधिकार बाँडफाँटलाई लिएर विवाद देखिएको छ।
प्रसाईंले पछिल्लो समय एक युट्युब च्यानललाई दिएको अन्तर्वार्तामा धवलशम्शेर राणामाथि विभिन्न आरोप लगाएपछि दुई पक्षबीचको सहकार्य थप अन्योलमा परेको धवल पक्षका नेताहरूको भनाइ छ।
विवादको मुख्य विषय ‘सर्वोच्च नेता’ र अध्यक्षको अधिकार तथा वरीयतालाई लिएर देखिएको छ। धवल पक्षले पार्टी अध्यक्ष नै पहिलो वरीयतामा हुनुपर्ने अडान राखेको छ। प्रसाईं पक्षले भने ‘सर्वोच्च नेता’भन्दा माथि अर्को पद हुन नसक्ने तर्क गर्दै उक्त पदको काम, कर्तव्य र अधिकार स्पष्ट रूपमा परिभाषित गर्नुपर्ने माग गरेको छ।
प्रसाईं पक्षले ‘सर्वोच्च नेता’लाई कार्यकारी अधिकारसमेत दिनुपर्ने र अध्यक्षसँग अधिकार बाँडफाँट गर्नुपर्ने अडान राखेको छ। चुनावमा उम्मेदवारको टिकट वितरण गर्दा प्रसाईंको हस्ताक्षर अनिवार्य हुनुपर्ने प्रस्तावसमेत गरिएको छ। तर, धवल पक्ष यसमा सहमत छैन।
दुवै पक्षका कार्यदलबीच बुधबार भएको बैठकमा समेत सहमति जुट्न सकेन। यद्यपि, सहकार्यको सम्भावना पूर्ण रूपमा समाप्त नभएको दुवै पक्षका नेताहरूले बताएका छन्।
धवल पक्षका नेता गिरीले सकेसम्म मिलेरै अघि बढ्ने आफूहरूको चाहना रहेको बताए। उनका अनुसार प्रसाईंले दिएका अभिव्यक्तिलाई व्यक्तिगत धारणा मानेर सहकार्यलाई निरन्तरता दिने सम्भावना अझै कायम छ।
यस्तै, प्रसाईं पक्षका नेता माधव कल्पितले पनि आफूहरू मिलेरै अघि बढ्ने पक्षमा रहेको बताए। दुई पक्षबीच अहिले पनि संवाद भइरहेको र साउन २९ गते सँगै निर्वाचन आयोग पुगेर पार्टी दर्ता गर्ने सम्भावना कायमै रहेको उनको दाबी छ।
प्रकाशित मिति: बुधबार, साउन २७, २०८३
