काठमाडौं । देश राजनीतिक, सामाजिक तथा आर्थिक चुनौतीबाट गुज्रिरहेका बेला नेपाली कांग्रेसभित्रको आन्तरिक एकता झन् आवश्यक भएको भन्दै **‘देश र कांग्रेस जोड्ने अभियान’**ले एकताको पक्षमा पहल अघि बढाएको छ।
कांग्रेसलाई गुट, समूह र व्यक्तिगत स्वार्थभन्दा माथि उठाएर बलियो तथा एकताबद्ध बनाउन भन्दै विगत दुई महिनादेखि संवाद, छलफल र विमर्श गर्दै आएको अभियानले राजधानीमा बुद्धिजीवी तथा नागरिक अगुवाहरूसँग अन्तरक्रिया गरेको हो।
कार्यक्रममा बोल्दै नेपाली कांग्रेसका निवर्तमान केन्द्रीय सदस्य नैनसिंह महरले देश संकटमा परेका बेला कांग्रेसभित्रको एकता झन् आवश्यक भएको बताए।
उनले गाउँका जनता र ‘भुइँ कांग्रेस’का कार्यकर्ताको एउटै अपेक्षा कांग्रेस बलियो र एकताबद्ध होस् भन्ने रहेको बताए।
‘कार्यकर्ता विभाजन चाहँदैनन्, उनीहरू नेतृत्व मिलेको हेर्न चाहन्छन्,’ महरले भने।
उनका अनुसार कांग्रेसको आन्तरिक विवाद अब नेताहरूको मात्र विषय रहेन। यसको प्रत्यक्ष प्रभाव पार्टी संगठन, कार्यकर्ता तथा आम नागरिकको मनोविज्ञानमा परेको छ। त्यसैले कांग्रेसलाई पुनः जनतासँग जोड्न पनि आन्तरिक एकता पहिलो सर्त भएको उनको भनाइ छ।
‘कांग्रेसभित्र मतभिन्नता हुन सक्छ, विचारमा बहस हुन सक्छ, नेतृत्वका लागि प्रतिस्पर्धा पनि हुन सक्छ। तर पार्टी नै कमजोर हुने गरी विभाजन स्वीकार्य हुँदैन,’ महरले भने।
हालै सम्पन्न राष्ट्रिय भेलाले कांग्रेस एकताको पक्षमा देशव्यापी हस्ताक्षर अभियान सञ्चालन गर्ने निर्णय गरेको जानकारी दिँदै महरले एकताका लागि सबै तहका नेताहरू व्यक्तिगत स्वार्थ, पद र प्रतिष्ठाभन्दा माथि उठ्नुपर्ने बताए।
‘कांग्रेस एकताको कुरा गर्ने हो भने सबैभन्दा पहिले नेताहरू त्यागका लागि तयार हुनुपर्छ। कसैले एक कदम पछाडि हट्नुपर्छ, कसैले आफ्नो अडानमा पुनर्विचार गर्नुपर्छ। तर कांग्रेसलाई फुटबाट जोगाउनैपर्छ,’ उनले भने।
महरले कांग्रेसको एकता पार्टीभित्रको व्यवस्थापनको विषय मात्र नभई लोकतन्त्र र देशको भविष्यसँग जोडिएको राष्ट्रिय आवश्यकता भएको बताए।
‘आज देशलाई बलियो लोकतान्त्रिक शक्ति चाहिएको छ। त्यो भूमिका निर्वाह गर्ने जिम्मेवारी कांग्रेसको हो। त्यसैले कांग्रेस कमजोर हुने, फुट्ने वा विभाजित हुने अवस्था देशका लागि पनि सुखद होइन,’ उनले भने।
कार्यक्रममा वरिष्ठ पत्रकार किशोर नेपाल, नेपाल इन्जिनियरिङ एसोसिएसनका पूर्वअध्यक्ष ध्रुव थापा, पूर्वउपकुलपति प्रेमनारायण अर्याल, नेपाल पत्रकार महासंघका पूर्वअध्यक्ष धर्मेन्द्र झा, डेमोक्रेटिक लयर्स एसोसिएसनका पूर्वराष्ट्रिय अध्यक्ष योगेन्द्र अधिकारी, प्राध्यापक मनोज कर्ण, पूर्वसांसद रामजीवन सिंह, अभियन्ता गोपाल झा, तेजप्रसाद पण्डित, ज्ञानेन्द्र देवकोटालगायत विभिन्न क्षेत्रका सयभन्दा बढी बुद्धिजीवी तथा नागरिक अगुवाको सहभागिता थियो।
राष्ट्रिय सभा सांसद रञ्जित कर्णले सञ्चालन गरेको कार्यक्रममा सहभागीहरूले कांग्रेसभित्रको वर्तमान परिस्थितिको गम्भीर समीक्षा गर्दै व्यक्तिभन्दा पार्टी, गुटभन्दा संगठन र पदभन्दा देशलाई प्राथमिकता दिनुपर्ने धारणा राखेका थिए।
सहभागीहरूको साझा धारणा थियो, ‘कांग्रेसमा विचारको बहस होस्, नेतृत्वका लागि प्रतिस्पर्धा होस्, तर विभाजन नहोस्।’
देशव्यापी हस्ताक्षर संकलन गर्ने
‘देश र कांग्रेस जोड्ने अभियान’ले कांग्रेसभित्र एकताको पक्षमा जनमत निर्माण गर्ने उद्देश्यले देशव्यापी हस्ताक्षर संकलन कार्यक्रम अघि बढाउने जनाएको छ।
अभियानका अनुसार हस्ताक्षर कागजमा गरिने समर्थन मात्र नभई ‘कांग्रेस एकताबद्ध हुनुपर्छ’ भन्ने आम कार्यकर्ता र शुभेच्छुकको सामूहिक आवाजका रूपमा अघि बढाइनेछ।
अभियानका अगुवाहरूले कांग्रेसलाई पुनः गाउँ, कार्यकर्ता र आम नागरिकको भावनासँग जोड्ने उद्देश्य रहेको बताएका छन्। साथै, आगामी दिनमा देशका विभिन्न ठाउँमा पुगेर कांग्रेसका नेता, कार्यकर्ता, बुद्धिजीवी, नागरिक समाज तथा शुभेच्छुकसँगको संवादलाई थप व्यापक बनाउने जनाएका छन्।
प्रकाशित मिति: मंगलबार, साउन २६, २०८३
-1786442917.jpeg)
