काठमाडौं : नेपाल कम्युनिष्ट पार्टीका संयोजक पुष्पकमल दाहाल ‘प्रचण्ड’ले राष्ट्रिय स्वतन्त्र पार्टी (रास्वपा)का सभापति रवि लामिछानेले आफूलाई “गुन तिर्न बाँकी रहेको” बताएका छन्।
सिंहदरबारमा आज पत्रकारहरूसँग कुराकानी गर्दै प्रचण्डले लामिछानेसहित रास्वपाका नेताहरूसँग आफ्नो नियमित संवाद भइरहने बताए। उनले भने, “रवि लामिछाने, डीपी अर्याल र विराजभक्त सबै मेरो क्याबिनेटमै बसेका कारण उहाँहरूलाई बुझ्न मलाई गाह्रो छैन। उहाँहरूसँग नियमित संवाद भइरहेको छ र कैयौँ विषयमा सल्लाह पनि मिलिरहेको छ।”
प्रचण्डले लामिछानेमा राजनीतिक परिपक्वता बढ्दै गएको टिप्पणी गर्दै हाँस्दै भने, “तुलनात्मक रूपमा राजनीतिक परिपक्वता रविमै देखिएको कुरा सबैले महसुस गरेकै छन्। फेरि मेरो गुन तिर्न पनि बाँकी छ।”
उनले विगतमा संसद र सार्वजनिक रूपमा आफूले लामिछानेको पक्षमा उभिएको स्मरण गरे। “मैले धेरैपटक डिफेन्स गरेको छु, संसदमा पनि र सार्वजनिक रूपमा पनि। जेलमा भेट्न पनि गएको थिएँ, बाहिर आएपछि बोलेँ,” उनले भने।
यसै क्रममा प्रचण्डले बालेन शाह नेतृत्वको सरकारले गठन गरेको संविधान संशोधन कार्यदलप्रति असन्तुष्टि जनाउँदै त्यसले संशोधनभन्दा पुनर्लेखन गर्ने उद्देश्य राखेको आरोप लगाए। “संविधानका आधारभूत राजनीतिक सिद्धान्तहरू नै परिवर्तन गर्ने नियत देखियो। संशोधनभन्दा पुनर्लेखन गर्ने प्रयास जस्तो लाग्यो,” उनले भने।
उनका अनुसार संविधानको प्रस्तावनादेखि नै परिवर्तन गर्न खोजिएको संकेत पाएपछि विपक्षी दलहरूले उक्त कार्यदलबाट बाहिरिने निर्णय गरेका हुन्।
प्रचण्डले निर्वाचनपछि रास्वपामा जनताको ठूलो आकर्षण देखिए पनि अहिले त्यो प्रवृत्ति केही रोकिएको दाबी गरे। “जनता अहिले रोकिएका छन्। मधेसमा त पश्चातापसमेत देखिएको छ,” उनले भने।
रास्वपामा अन्य दलबाट गएका नेताहरूको उल्लेख गर्दै उनले ठट्टा गर्दै भने, “हामी माओवादीले पनि २३ जना पठाएका छौँ जस्तो लाग्छ, एमालेले २७ जना र कांग्रेसले ३३ जना पठाएको जस्तो देखिन्छ।”
प्रचण्डले संविधान निर्माणपछि सरकार गठन र विघटनमै राजनीतिक ध्यान केन्द्रित हुँदा मूल उद्देश्य ओझेलमा परेको स्वीकार गरे। “हाम्रो लक्ष्य सुशासन, समृद्धि र न्याय दिनु थियो। तर हामी सरकार बनाउने र गिराउनेमै अल्झियौँ,” उनले भने।
वर्तमान सरकारप्रति टिप्पणी गर्दै उनले यसलाई “समुद्रमा कम्पास हराएको जहाज” जस्तो भएको बताए। “सरकार वैचारिक र राजनीतिक रूपमा दिशाविहीन देखिन्छ। यसरी धेरै अघि बढ्न सक्दैन,” उनले भने।
प्रकाशित मिति: सोमबार, साउन २५, २०८३
