काठमाडौं । अर्थमन्त्री डा. स्वर्णिम वाग्लेले नेपालमा सञ्चालनमा रहेका २० बहुराष्ट्रिय कम्पनीका सञ्चालक तथा प्रतिनिधिसँग आज छलफल गरेका छन्। अर्थ मन्त्रालयमा भएको उक्त बैठकमा लगानी वातावरण, बजेट कार्यान्वयन तथा निजी क्षेत्रसँगको सहकार्यका विषयमा विस्तृत छलफल भएको हो।
बैठकमा सूर्य नेपाल, एनसेल आजियाटा, गोर्खा ब्रुअरी, हिमालय एयरलाइन्स, डाबर नेपाल, यूनिलिभर नेपाल लगायतका प्रमुख कम्पनीका प्रतिनिधिहरू सहभागी थिए। त्यस्तै होङ्सी सिमेन्ट, पावर कन्स्ट्रक्सन कर्पोरेसन अफ चाइना, एसियन पेन्ट्स, टर्की एयरलाइन्स, वरुण बेभरेज लगायतका कम्पनीहरूको पनि उपस्थिति रहेको मन्त्रालयले जनाएको छ।
अर्थमन्त्री वाग्लेले आर्थिक वर्ष २०८३/८४ को बजेट कार्यान्वयनलाई प्रभावकारी बनाउने उद्देश्यले ठूला करदाता बहुराष्ट्रिय कम्पनीहरूसँग प्रत्यक्ष संवाद गरेको बताए। उनले कम्पनीहरूलाई बजेटबाट प्राप्त सुविधा, लगानीका क्रममा भोग्नुपरेका समस्या तथा भविष्यमा लगानी विस्तारका सम्भावनाबारे लिखित सुझाव पेश गर्न आग्रह गरे।
बैठकमा बोल्दै अर्थमन्त्री वाग्लेले वैध लगानी, सम्पत्ति र नाफाको सुरक्षा गर्नु सरकारको प्रमुख जिम्मेवारी भएको स्पष्ट पारे। उनले निजी क्षेत्रलाई केवल व्यवसायिक समूह नभई राष्ट्र निर्माणका साझेदारको रूपमा लिनुपर्ने धारणा व्यक्त गरे।
उनका अनुसार नेपालको आर्थिक रूपान्तरण सरकार र निजी क्षेत्रको संयुक्त प्रयासबाट मात्र सम्भव छ। उनले उत्पादन, लगानी र रोजगारीबीचको सम्बन्धलाई बलियो बनाउँदै अर्थतन्त्रलाई गतिशील बनाउने सरकारको लक्ष्य रहेको बताए।
“निजी क्षेत्रको सफलता नै देशको आर्थिक सफलताको आधार हो,” उनले भने, “सरकार निजी क्षेत्रलाई शङ्काको दृष्टिले होइन, साझेदारको रूपमा हेर्छ।”
अर्थमन्त्री वाग्लेले उद्योगी–व्यवसायीहरूलाई लगानी विस्तार गर्न, नयाँ प्रविधि भित्र्याउन र थप रोजगारी सिर्जना गर्न आह्वान गर्दै सरकार आवश्यक सहजीकरण गर्न प्रतिबद्ध रहेको पनि बताए।
प्रकाशित मिति: सोमबार, साउन २५, २०८३
