वासिंगटन । अमेरिकाले देशमा निश्चित उत्पादनलाई मात्र करमुक्त आयात अनुमति दिने नयाँ योजना अन्तर्गत भारतले पाउँदै आएको विशेष सहुलियतपूर्ण व्यवस्था अन्त्य गर्ने भएको छ ।
अमेरिकी राष्ट्रपति डोनल्ड ट्रम्पले भारतले बजारमा अमेरिकालाई युक्तिसंगत पहुँच प्रदान गर्ने कुरामा आश्वास्त तुल्याउन नसकेको बताएका छन् ।
भारतसँगै अमेरिकाले टर्कीलाई पनि विशेष ब्यापारिक दर्जा पनि अन्त्य गर्ने भएको छ । यस्तो सुविधाका लागि टर्कीं अब योग्य नभएको अमेरिकी तर्क छ ।
अमेरिकाले विभेदपूर्ण व्यापार अन्त्य गर्न भन्दै विभिन्न कदम चाल्दै आएको छ । सोही क्रममा अमेरिकाको पछिल्लो कदम बाहिर आएको हो । ट्रम्पले भारतले अमेरिकी सामानमाथि उच्च कर लगाएको बताउँदै आएका थिए ।
प्रतिनिधिसभालाई एक पत्र लेख्दै ट्रम्पले भारतले उसको बजारमा बारबरी र युक्तिसंगत पहुँच प्रदान गर्नेमा आश्वस्त पार्न नसकेको उल्लेख गर्दै पत्र लेख्दै सहुलियतपूर्ण व्यापारिक सुविधा प्रदान गरिने एक कार्यक्रमबाट भारतको नाम हटाउन भनेका छन् ।
जीएसपी कार्यक्रम भनिने त्यस्तो सहुलियत कार्यक्रममा निश्चित उत्पादनहरूलाई अमेरिकामा करमुक्त प्रवेश प्राप्त हुनेछ । जसका लागि योग्य विकासशील देशहरूले कंग्रेसले निर्धारण गरेका मापदण्डहरू पूरा गर्नुपर्छ ।
त्यस्ता मापदण्डअनुसार बौद्धिक सम्पतिको सुरक्षा र अमेरिकालाई बजारमा युक्तिसंगत र उपयुक्त पहुँच प्रदान गर्नुपर्छ ।
अमेरिकाले टर्कीलाई पनि जीएसपी कार्यक्रमबाट हटाउने भएको छ । टर्की पर्याप्त मात्रामा विकसित भइसकेकाले उसलाई अब यस्तो सुविधा आवश्यक नरहेको तर्क गरिएको छ । सम्बन्धित देशलाई यी परिवर्तनबारे सुचित गरिएको ६० दिनसम्म भने नयाँ परिवर्तन लागू हुने छैनन् ।
प्रकाशित मिति: मंगलबार, फागुन २१, २०७५
-1732776560.jpg)
