२५ साउन, भक्तपुर । प्राविधिक शिक्षा तथा व्यावसायिक तालिम परिषद् (सीटीइभीटी) अन्तर्गत देशभरका ६७ वटा आङ्गिक शिक्षालयमा कार्यरत करार तथा ज्यालादारी कर्मचारीहरूले केन्द्रीय कार्यालय घेराउ गरेका छन् ।
साउन १४ गतेदेखि देशभरका ६७ वटै आङ्गिक शिक्षालयमा चरणबद्ध आन्दोलनका कार्यक्रम सञ्चालन गर्दै आएका कर्मचारीहरूले व्यवस्थापनले आफ्ना मागप्रति कुनै सुनुवाइ नगरेपछि पूर्वघोषित कार्यक्रमअनुसार आजदेखि भक्तपुरको सानोठिमीस्थित केन्द्रीय कार्यालय घेराउ गरेका हुन् । आन्दोलनमा देशभरिका करिब २,२०० करार तथा ज्यालादारी श्रमिक सहभागी रहेका छन् ।
आन्दोलनरत कर्मचारीहरूले समान कामका लागि समान ज्याला हुनुपर्ने माग राखेका छन् । साथै, उनीहरूले स्थानीय भत्ता, दुर्गम भत्ता, महँगी भत्ता, प्रोत्साहन भत्ता, सामाजिक सुरक्षा तथा पेशागत स्थायित्वको व्यवस्था गर्न माग गरेका छन् ।
लामो समयदेखि परिषद् मातहतका विभिन्न शिक्षालयमा कार्यरत कर्मचारीहरूले समान प्रकृतिको काम गर्दै आए पनि सेवा–सुविधा र पारिश्रमिकमा विभेद गरिएको भन्दै न्यायोचित व्यवस्था गर्नुपर्ने बताएका छन् ।
करार तथा ज्यालादारी केन्द्रीय सङ्घ समिति सह–संयोजक इ. युकेश गौतमले साउन १४ गतेदेखि सञ्चालन गरिएको आन्दोलनका कार्यक्रमका बाबजुद पनि व्यवस्थापनले माग सम्बोधन गर्न चासो नदेखाएपछि केन्द्रीय कार्यालय घेराउ गर्न बाध्य भएको बताए । उनले वार्ता र संवादमार्फत तत्काल माग सम्बोधन गर्नुपर्नेमा जोड दिएका छन् ।
प्रकाशित मिति: सोमबार, साउन २५, २०८३
