वासिङटन । अमेरिकी रक्षामन्त्री जेम्स माटिसले राष्ट्रपति डोनाल्ड ट्रम्पको कार्यशैलीप्रति प्रश्न उठाउँदै आफ्नो पदबाट राजीनामा दिएका छन् ।
माटिस सिरियामा तैनाथ करिब २ हजार सैनिकलाई फर्काउन नहुने पक्षमा थिए । तर, ट्रम्पले त्यहाँ आईएस परास्त भएको भन्दै सैनिक फिर्ता गर्ने घोषणा गरेपछि उनी असन्तुष्ट बनेका हुन् ।
उनले दिएको राजीनामा पत्रमा विचार मिल्ने क्षमतावान व्यक्तिलाई रक्षा मन्त्री बनाउने अधिकार राष्ट्रपतिसँग रहेको उल्लेख गरेका छन् । ट्रम्पले बिहीबार माटिसले राजीनामा दिएको सार्वजनिक गर्दै फेब्रुअरीको अन्त्यबाट त्यो लागू हुने बताएका छन् ।
ट्रम्पले सम्मानका साथ जिम्मेवारीबाट अवकास हुन लागेको भन्दै ट्वीटरमार्फत उनलाई धन्यवादसमेत दिएका छन् । उनले लेखेका छन्, ‘मित्र शक्ति र अन्य देशहरुको सैन्य दायित्व निर्वाह गर्न गरेको सहयोगप्रति म धन्यवाद दिन चाहन्छु ।’
माटिसले ट्रम्प प्रशासन सुरु भएदेखि नै रक्षा मन्त्रीको जिम्मेवारी सम्हालेका थिए । उनलाई ट्रम्प मन्त्रिपरिषद्को स्थिर तथा स्वतन्त्र सदस्यका रुपमा लिने गरिन्थ्यो ।
ट्रम्प प्रशासनबाट एकपछि अर्को जिम्मेवार व्यक्ति बाहिरिने क्रममा माटिस पछि थपिएका हुन् । रक्षा मन्त्रीको राजीनामालाई ट्रम्पमाथिको ठूलो झट्काका रुपमा हेरिएको छ ।
प्रकाशित मिति: बिहीबार, पुस ५, २०७५
-1732776560.jpg)
