प्योङयाङ । उत्तर कोरियाले आफ्ना अधिकारीहरूमाथि अमेरिकाले लगाएका नयाँ प्रतिबन्धको कडा शब्दमा भत्र्सना गर्दै त्यसले स्थायी रूपमा परमाणु अस्त्र निशस्त्रीकरण प्रभावित हुने चेतावनी दिएको छ ।
उत्तर कोरियामा प्रेसमाथि प्रतिबन्ध लगाइएको, रेडियो संकेतहरू रोकिएको र विदेशी चलचित्र हेर्ने मानिसहरूलाई थुनिएको विवरण बाहिर आएपछि अमेरिकाले तीन उत्तर कोरियाली अधिकारीहरूमाथि प्रतिबन्ध लगाएको थियो ।
अमेरिकाले नयाँ प्रतिबन्धको घोषणा गर्ने बित्तिकै उत्तर कोरियाले यस्ता कदमले आफ्नो परमाणु कार्यक्रममा हेरफेर गर्न कुनै दबाव नदिने उल्लेख गरेको छ ।
उत्तरले अमेरिकी कदमले उत्तर कोरिया स्तब्ध र क्रुद्ध भएको प्रतिक्रिया दिएको छ ।
उत्तर कोरियाली समाचार संस्था केसीएनएले छापेको वक्तव्यले अमेरिकी विदेश मन्त्रालय दुई देशबीचको सम्बन्धलाई पुरानै अवस्थामा फर्काउन उद्धत रहेको उल्लेख गरिएको छ ।
उत्तर कोरियाली नेता किम जोङ्ग–उन र अमेरिकी राष्ट्रपति डोनाल्ड ट्रम्पबीच गत जुन महिनामा सिंगापुरमा भएको बैठकमा त्यस विषयमा अस्पष्ट सम्झौता भएको थियो । तर त्यसयता त्यस विषयमा थप प्रगति हुन सकेको छैन ।
प्रकाशित मिति: आइतबार, पुस १, २०७५
-1732776560.jpg)
