नयाँ दिल्ली । भारतको रिजर्भ बैंकका गभर्नर उर्जित पटेलले पदबाट राजीनामा दिएका छन् । उनले आफ्नो निजी कारणले राजीनामा दिएको उल्लेख गरेका छन् । उर्जित पटेलले राजीनामाका विषयमा विस्तृत विवरण आरबीआईको वेबसाइटमा जारी गरेका छन् ।
उनले निजी कारण भनेपनि लामो समयदेखि सरकार र बैंकबीच तनावको अवस्था रहेको थियो ।
रिजर्भ बैंकका डेपुटी गभर्नर विरल आचार्यले आफ्नो एक भाषणका क्रममा खुलेर रिजर्भ बैंकको स्वायत्तताको वकालत गरेका थिए । त्यसलगत्तै नगदी उपलब्धता, क्रेडिट फ्लोे र सरकारको नियन्त्रणलाई लिएर मोदी सरकार र रिजर्भ बैंकबीच मतभेद रहेको अनुमान गरिएको थियो ।
पछिल्ला केही समयदेखि मोदी सरकार र गभर्नर उर्जित पटेलबीच मनमुटावका समाचार पनि बाहिर आएका थिए । सरकारले आरबीआई ऐनको सेक्सन–७ भित्र आफ्नो विशेषधिकार लागु गरेको बताइएको थियो । यसलाई रिजर्भ बैंकको स्वायत्ततामाथि हस्तक्षेपका रुपमा हेरिएको थियो ।
वित्त मन्त्रालयले रिजर्भ बैंक कानुनको धारा ७ लागु गर्ने तयारी गरिरहेको समेत खबर आएको थियो । यो धारामा सरकारलाई जनहितको मुद्दामा रिजर्भ बैंकका गभर्नरलाई निर्देशन दिने अधिकार उल्लेख गरिएको छ ।
यस्तै सरकारले रिजर्भ बैंकसँग ३ लाख ६० हजार करोड भारतीय रुपैयाँ माग गरिरहेको थियो । जुन कुराको आरबीआईले विरोध गरिरहेको थियो । यी सबै मुद्दाले गभर्नर र सरकारबीच तनावको अवस्था सिर्जना भएको थियो । यी सबै खिचातानीका बिच गभर्नर उर्जित पटेलले प्रधानमन्त्री मोदीसँग ९ नोभेम्बरमा छलफल गरेका थिए ।
प्रकाशित मिति: सोमबार, मंसिर २४, २०७५
-1732776560.jpg)
