एजेन्सी । संयुक्त राष्ट्रसंघकी वातावरणसम्बन्धी प्रमुख पेट्रिसिया एसपिनोसाले विश्वव्यापी तापमान वृद्धिका कारण मानवजातिले हालसम्मकै सबभन्दा धेरै खतरा सामना गरिरहेको चेतावनी दिएकी छन् ।
पोल्याण्डमा आयोजित जलवायुसम्बन्धी अन्तर्राष्ट्रिय सम्मेलनको उदघाटन कार्यक्रममा उनले सो चेतावनी दिएकी हुन् ।
उनले भनिन्, ‘जलवायु परिवर्तनले विश्वका विभिन्न समुदाय नराम्ररी प्रभावित भएका छन् । प्राकृतिक विपदले जताततै विनाश निम्त्याइरहेको छ । यस्तोमा जलवायु परिवर्तनको प्रभाव कम गर्न हामीले आपतकालीन कदमहरू चाल्न थाल्नु अपरिहार्य भएको छ ।’
जलवायु परिवर्तनलाई सीमित पार्न आयोजित महत्त्वपूर्ण अन्तर्राष्ट्रिय सम्मेलन तोकिए भन्दा एक दिन अगाडि नै पोल्याण्डमा सुरु भएको छ ।
आइपीसीसी ले तापमान वृद्धिलाई डेढ डिग्री सेल्सियसमा सीमित पार्न सरकारहरूले हरित गृह ग्यास उत्सर्जनलाई सन् २०३० भित्र ४५ प्रतिशतले कटौती गर्नु पर्ने भनेको छ ।
पोल्याण्ड सम्मेलनमा जलवायु परिवर्तनलाई सीमित पार्ने कार्यमा संलग्न चार वरिष्ठ अधिकारीहरूले पृथ्वी ग्रह चौबाटोमा आइपुगेको बताएका छन् । उनीहरुले एक दुर्लभ कदमको रूपमा हेरिएको उक्त घटनामा निर्णायक कदमका लागि अपिल गरेका छन् ।
सन् २०१५ मा प्यारिस सम्झौता भएयता जलवायु परिवर्तनसम्बन्धी सबभन्दा महत्त्वपूर्ण पहलको रूपमा पोल्याण्डको क्याटोभिट्समा आयोजित सम्मेलनलाई लिइएको छ । प्यारिस सम्झौतामा तोकिएका लक्ष्य भेट्टाउने हो भने संसारले कार्बन उत्सर्जनको मात्रामा व्यापक कटौती गर्नुपर्ने विज्ञहरूले औँल्याएका छन् । बीबीसी
प्रकाशित मिति: आइतबार, मंसिर १६, २०७५
-1732776560.jpg)
