काठमाडौं । इन्धनको मूल्य वृद्धिको विरोधमा फ्रान्समा हिंसात्मक प्रदर्शन भएको छ ।
सरकारले पेट्रोल र डिजेलको मूल्य अस्वाभाविक बढाएको भन्दै फ्रान्सका जनताले सरकारविरुद्ध एक सातादेखि प्रदर्शन गर्दै आएका छन् । प्रदर्शनकारीले राजधानी पेरिसको शान्ज एलीज इलाकाका निषेधित क्षेत्र तोड्ने प्रयास गरेपछि प्रहरीसँग झडप भएको थियो ।
प्रहरीले अश्रुग्यास र पानीको फोहोरा प्रयोग गरी प्रदर्शनकारीलाई तितरबितर पारेको थियो । तर आक्रोशित समूहले केही गाडीहरुमा आगजनी र तोडफोड गरे भने प्रहरीमाथि ढुंगामुढासमेत गरे ।
इन्धनको मूल्य वृद्धिको विरोधमा फ्रान्समा हजारौं प्रदर्शनकारीहरुले पहेंलो रंगको ज्याकेट लगाएर सरकारविरुद्ध सडकमा उत्रिएका छन् । उनीहरुले राष्ट्रपति इनम्यानुएल म्याक्रोको राजीनामा माग्दै नाराबाजी गरेका छन् । स्थितिलाई नियन्त्रणमा लिन ३ हजारभन्दा बढी प्रहरीहरु तैनाथ गरिएको छ ।
फ्रान्सका गृहमन्त्री क्रिष्टोफर कास्टानेयरले दक्षिणपन्थी रीसेम्बलमेन्ट नेशनल पार्टीका नेता मेरीन ले पेनको उक्साहटमा प्रदर्शनकारीहरु एकजुट भएको दाबी गरेका छन् । उनले मेरीनलाई बेइमानको आरोपसमेत लगाएका छन् ।
प्रकाशित मिति: शनिबार, मंसिर ८, २०७५
-1732776560.jpg)
