काभ्रेपलाञ्चोक । काभ्रेपलाञ्चोकको खानीखोला गाउँपालिका–१ स्याउलीथलीमा जिप दुर्घटना हुँदा दुई जनाको मृत्यु भएको छ भने तीन जना गम्भीर घाइते भएका छन्।
पनौती–तालढुंगा भित्री सडकखण्डअन्तर्गत स्याउलीथलीमा सोमबार नम्बर नखुलेको जिप सडकबाट करिब २०० मिटर तल खसेर दुर्घटना भएको हो।
प्रहरीका अनुसार दुर्घटनामा मृत्यु भएका दुवै जनाको पहिचान खुल्न सकेको छैन। जिपमा सवार ताराबहादुर माझी भने हाम फालेर ज्यान बचाउन सफल भएका छन्। उनी सामान्य घाइते भएका छन्।
दुर्गम स्थानमा दुर्घटना भएकाले फलामेटार, तालढुंगा र ढुंखर्क प्रहरी टोली घटनास्थलतर्फ गएको जिल्ला प्रहरी कार्यालय काभ्रेका सूचना अधिकारी रविन विष्टले जानकारी दिए।
प्रारम्भिक अनुसन्धानअनुसार जिपको ब्रेक फेल भएर दुर्घटना भएको हुन सक्ने प्रहरीले जनाएको छ। घटनाबारे थप विवरण आउन बाँकी छ।
प्रकाशित मिति: सोमबार, भदौ १, २०८३
