मञ्चका कार्यवाहक अध्यक्ष अधिवक्ता हरिश्चन्द्र भट्टराईले प्रेस विज्ञप्ति जारी गर्दै साउन ३० गते सम्पन्न निर्वाचन प्रक्रिया धाँधलीपूर्ण, एकपक्षीय र अपारदर्शी भएको दाबी गरेका छन्।
उनले निर्वाचन प्रक्रिया स्वतन्त्र र निष्पक्ष निर्वाचनका स्थापित मान्यताविपरीत रहेको आरोप लगाएका छन्। कानुन व्यवसायीको पेशागत हक, स्वतन्त्रता, मर्यादा तथा लोकतान्त्रिक मूल्यमान्यताको संरक्षण गर्ने जिम्मेवारी बोकेको बार संस्थाकै निर्वाचन निष्पक्ष, पारदर्शी र विश्वसनीय हुन नसकेको उनको भनाइ छ।
भट्टराईले निर्वाचन व्यवस्थापनमा एकपक्षीयता देखिएको, अनधिकृत व्यक्तिहरूको संलग्नतामा निर्वाचन सञ्चालन गरिएको तथा सम्बन्धित कानुन व्यवसायीको स्वतन्त्र सहभागिता र निर्वाचन अधिकारमा प्रतिकूल प्रभाव पार्ने गरी काम भएको आरोप लगाएका छन्।
उनका अनुसार बार एशोसिएसनको निर्वाचन कुनै व्यक्ति वा समूह विशेषको स्वार्थपूर्तिको माध्यम नभई समग्र कानुन व्यवसायीको साझा संस्था निर्माण गर्ने लोकतान्त्रिक अभ्यास हुनुपर्छ।
निर्वाचनमा देखिएका गतिविधिले निर्वाचनको निष्पक्षता र वैधानिकतामाथि नै गम्भीर प्रश्न खडा गरेको मञ्चले जनाएको छ।
