तनहुँ । अर्थमन्त्री डा. स्वर्णिम वाग्लेले सीमित स्रोतसाधनका बाबजुद जनताको आधारभूत आवश्यकता पूरा गर्न सरकार प्रतिबद्ध रहेको बताएका छन् ।
तनहुँको व्यास नगरपालिका–१० दुम्सीमा बिहीबार मतदातासँगको भेटघाटमा उनले जनताका अपेक्षा धेरै भए पनि बजेटको सीमाभित्र रहेर सरकारले आवश्यकताअनुसार काम अघि बढाइरहेको बताए ।
‘बजेटका सीमाहरु छन्, रकम थोरै छ । जनताका अपेक्षा धेरै छन् । जुन बस्तीमा पुगे पनि जनताले खानेपानी, सडक, विद्यालय, स्वास्थ्यचौकी, तटबन्धन, खेलमैदानका माग गर्नुहुन्छ,’ उनले भने, ‘सरकारले सक्दो त्यसलाई सम्बोधन गर्न प्रयास गरिरहेको छ ।’
अर्थमन्त्री वाग्लेले तनहुँको विकासका लागि आफू प्रतिबद्ध रहेको बताउँदै यसपटकको बजेट वितरणमा न्यायोचित बनाउन पहल गरिएको जानकारी दिए ।
तनहुँका जनताले आफूलाई दुई पटक प्रतिनिधिसभा सदस्यमा विजयी गराएको स्मरण गर्दै उनले जिल्लावासीले लगाएको गुन र ऋण आफूले कहिल्यै नबिर्सिने बताए ।
दुम्सीमा खानेपानी र तटबन्धनको समस्या समाधानका लागि सम्बन्धित मन्त्रालयसँग छलफल गरी काम अघि बढाउने प्रतिबद्धता पनि उनले जनाए ।
भेटघाटका क्रममा स्थानीयवासीले दुम्सीका करिब ५०० घरधुरी खानेपानीको समस्याबाट प्रभावित रहेको जानकारी अर्थमन्त्री वाग्लेलाई गराएका थिए।
प्रकाशित मिति: बिहीबार, साउन २८, २०८३
