काठमाडौं । नेपाल राष्ट्र बैंकको लघुवित्त संस्था सुपरिवेक्षण विभागले आर्थिक वर्ष २०८२/८३ को चौथो त्रैमासमा ६ वटा ‘घ’ वर्गका लघुवित्त वित्तीय संस्था तथा तिनका सञ्चालक, पदाधिकारी र प्रमुख कार्यकारी अधिकृतमाथि कारबाही गरेको छ ।
राष्ट्र बैंकले बुधबार सार्वजनिक गरेको सूचनाअनुसार फरवार्ड लघुवित्त वित्तीय संस्था, धौलागिरि लघुवित्त वित्तीय संस्था, मातृभूमि लघुवित्त वित्तीय संस्था, एनआईसी लघुवित्त वित्तीय संस्था, वीन नेपाल लघुवित्त वित्तीय संस्था र सञ्जीवनी लघुवित्त वित्तीय संस्थामाथि कारबाही गरिएको हो ।
फरवार्ड लघुवित्तले २०८२ असार मसान्तमा न्यूनतम पुँजीकोष अनुपात ६.१२ प्रतिशत मात्र कायम गरेको थियो । नियामकीय मापदण्ड पूरा नगरेको भन्दै राष्ट्र बैंकले बैंक तथा वित्तीय संस्थाको शीघ्र सुधारात्मक कारबाहीसम्बन्धी विनियमावली, २०७४ को विनियम ३(क) बमोजिम कारबाही गरेको जनाएको छ ।
धौलागिरि लघुवित्तले पनि सोही अवधिमा ६.३८ प्रतिशत मात्र पुँजीकोष अनुपात कायम गरेको थियो । उक्त संस्थालाई पनि विनियम ३(क) बमोजिम शीघ्र सुधारात्मक कारबाही गरिएको छ ।
मातृभूमि लघुवित्तले २०८२ असार मसान्तमा न्यूनतम पुँजीकोष अनुपात ४.०८ प्रतिशत मात्र कायम गरेको थियो । राष्ट्र बैंकले उक्त संस्थालाई विनियम ३(ख) बमोजिम शीघ्र सुधारात्मक कारबाही गरेको जनाएको छ ।
त्यस्तै, एनआईसी लघुवित्तले ६.३९ प्रतिशत मात्र न्यूनतम पुँजीकोष अनुपात कायम गरेकाले विनियम ३(क) बमोजिम शीघ्र सुधारात्मक कारबाही गरिएको राष्ट्र बैंकले जनाएको छ ।
वीन नेपाल लघुवित्तलाई भने २०८२ चैतमा अनिवार्य नगद मौज्दात कायम नगरेको भन्दै पहिलो पटकका लागि ५८ रुपैयाँ ३८ पैसा नगद जरिवाना गरिएको छ ।
सञ्जीवनी लघुवित्तलाई २०८२ चैत तथा २०८३ वैशाख, जेठ र असारमा अनिवार्य नगद मौज्दात कायम नगरेको भन्दै क्रमशः ७१३ रुपैयाँ ८८ पैसा, १ हजार ६७ रुपैयाँ ४० पैसा, १ हजार ४१२ रुपैयाँ ९१ पैसा र १ हजार ४१० रुपैयाँ ७८ पैसा नगद जरिवाना गरिएको राष्ट्र बैंकले जनाएको छ ।
-1787133994.jpg)