काठमाडौं । साताको अन्तिम कारोबार दिन शुक्रबार सेयर बजारमा दोहोरो अंकको वृद्धि भएको छ। यसदिन नेप्से परिसूचक २२.८५ अंकले बढेर २६४७.२२ विन्दुमा पुगेको हो।
नेप्से बढेसँगै कारोबार रकम पनि अघिल्लो दिनको तुलनामा बढेको छ। बिहीबार नेप्से ११.९३ अंकले बढेर २६२४.३६ विन्दुमा पुगेको थियो भने ५ अर्ब ४९ करोड रुपैयाँ बराबरको कारोबार भएको थियो।
शुक्रबार ३४५ वटा स्क्रिप्सको २ करोड १२ लाख ७२ हजार ७६१ कित्ता सेयर ६ अर्ब ७४ करोड ५६ लाख ३१ हजार ६०७ रुपैयाँमा खरिदबिक्री भएको छ।
कारोबारमा आएका कम्पनीमध्ये १९६ वटाको सेयर मूल्य बढ्दा ७४ वटाको घटेको छ भने ९ वटा कम्पनीको मूल्य स्थिर रह्यो।
स्नो रिभर्सको सेयर मूल्य सर्वाधिक १३.६६ प्रतिशतले बढेको छ। इन्फिनिटी लघुवित्त वित्तीय संस्थाको ९.८१ प्रतिशत, मैलुङ खोला जलविद्युत् कम्पनीको ८.८४ प्रतिशत, याम्बलिङ हाइड्रोपावरको ६.२० प्रतिशत र बोटलर्स नेपाल (तराई)को ५.०६ प्रतिशतले सेयर मूल्य बढेको छ।
ह्याथवे इन्भेस्टमेन्ट नेपालका लगानीकर्ताले भने सर्वाधिक गुमाएका छन्। कम्पनीको सेयर मूल्य १५ प्रतिशतले घटेको छ।
कारोबार रकमका आधारमा कुमारी बैंक शीर्ष स्थानमा रह्यो। बैंकको ३२ करोड रुपैयाँ बराबरको सेयर कारोबार भएको छ। लक्ष्मी सनराइज बैंकको २७ करोड, ग्लोबल आईएमई बैंकको २३ करोड, लिबर्टी इनर्जीको २२ करोड र सिद्धार्थ बैंकको २१ करोड रुपैयाँ बराबरको कारोबार भएको छ।
फाइनान्स र अदर्स समूहका उपसूचकबाहेक बाँकी सबै समूहका उपसूचक बढेका छन्। बैंकिङ र लाइफ इन्स्योरेन्स समूहका उपसूचक १ प्रतिशतभन्दा बढीले वृद्धि भएका छन्।
प्रकाशित मिति: शुक्रबार, असोज २, २०८३
-1787133994.jpg)
