काठमाडौं । अमेरिकी सरकारले न्युयोर्कमा हुने संयुक्त राष्ट्रसंघको महासभामा सहभागी हुन इरानी अधिकारीहरूलाई भिसा दिएको छ।
दुवै देशबीचको युद्ध सातौँ महिनामा प्रवेश गरिरहेका बेला अमेरिकाले इरानी प्रतिनिधिमण्डललाई महासभामा सहभागी हुन अनुमति दिएको हो।
बीबीसीका अनुसार अमेरिकी स्वीकृति पाएको प्रतिनिधिमण्डलमा इरानी राष्ट्रपति मसुद पेजेस्कियान र विदेशमन्त्री अब्बास अराघ्चीसमेत सहभागी हुनेछन्।
अमेरिकी विदेश मन्त्रालयका एक प्रवक्ताले बिहीबार इरानी प्रतिनिधिमण्डललाई भिसा दिने निर्णयको पुष्टि गरेका छन्। उनका अनुसार प्रतिनिधिमण्डलका सदस्यलाई भ्रमणसम्बन्धी प्रतिबन्ध लागू हुनेछ। उनीहरूले अमेरिकी नीतिअनुसार विलासितालगायत केही वस्तु खरिद गर्न पाउने छैनन्।
युद्ध अन्त्य हुने कुनै संकेत नदेखिएका बेला अमेरिकाको यस्तो निर्णय आएको हो। फेब्रुअरीमा सुरु भएको युद्धका कारण विश्वभर तेल तथा ग्यासको मूल्य बढेको छ भने यसको प्रभाव छिमेकी मुलुकसम्म पनि फैलिएको छ।
अमेरिकी विदेश मन्त्रालयका प्रवक्ताले बीबीसीसँग भनेका छन्, “आतिथ्य गर्ने देशका रूपमा हाम्रा जिम्मेवारीअन्तर्गत इरानी शासनको मुख्य प्रतिनिधिमण्डलले संयुक्त राष्ट्रसंघको महासभाको उच्चस्तरीय सप्ताहमा भाग लिन पाउनेछ।”
उनका अनुसार प्रतिनिधिमण्डलमाथि भ्रमणसम्बन्धी प्रतिबन्ध लागू हुनेछ र अमेरिकी नीतिअनुसार विलासिता तथा अन्य वस्तुको खरिदमा रोक लगाइनेछ। यसपटकको प्रतिनिधिमण्डल गत वर्षको तुलनामा सानो रहेको पनि उनले बताए।
प्रकाशित मिति: शुक्रबार, असोज २, २०८३
