काठमाडौं । सत्तारूढ दलका सांसद खगेन्द्र सुनारले नेपाल प्रहरीका लागि जुत्ता, मोजा, कपडालगायतका सामान खरिदमा भएको भनिएको अनियमितताबारे तत्काल छानबिन समिति गठन गर्न माग गरेका छन्।
लेखा समितिको बैठकमा बोल्दै सांसद सुनारले प्रहरी महानिरीक्षक (आईजीपी) माथि समेत प्रश्न उठिसकेको अवस्थामा उनलाई पदमै राखेर छानबिन गर्न नहुने बताए। उनले आरोपित पदाधिकारीलाई जिम्मेवारीबाट अलग गरी निष्पक्ष रूपमा छानबिन गर्नुपर्ने माग गरे।
सुनारले भने, ‘तत्काल छानबिन समिति बनाउनुपर्छ, आरोपित मानिसहरूलाई जिम्मेवारीबाट बाहिर राख्नुपर्छ र निष्पक्ष ढङ्गले छानबिन गरिनुपर्छ।’
प्रहरीका लागि खरिद गरिने जुत्ता, मोजा, कपडा तथा अन्य सामग्रीमा अनियमितता हुँदा त्यसको प्रत्यक्ष असर गरिब तथा निम्न वर्गबाट भर्ती भएका प्रहरी र म्यादी प्रहरीमाथि पर्ने उनले बताए।
निर्वाचनका क्रममा ठूलो संख्यामा म्यादी प्रहरी भर्ती हुने भएकाले उनीहरूले दुःख गरेर कमाएको रकममा समेत बदमासी गर्न नहुने उनको भनाइ छ। उनले ठेकेदार छनोट प्रक्रियामै अनियमितता भएको हुन सक्ने आशंका व्यक्त गर्दै यस विषयमा समेत छानबिन गर्नुपर्ने बताए।
प्रहरी संगठन र ठेकेदारबीचको सम्भावित सम्बन्ध तथा मिलेमतोबारे अनुसन्धान गर्नुपर्ने उनले बताए। जिल्लास्तरमा प्रहरीका लागि सामान खरिद गर्दा प्रहरीका बहालवाला तथा पूर्वकर्मचारी र ठेकेदारबीच कुनै सम्बन्ध वा मिलेमतो भए–नभएको समेत अध्ययन गर्नुपर्ने उनको माग छ।
प्रहरीको खरिदसम्बन्धी उजुरी अख्तियार दुरुपयोग अनुसन्धान आयोगलगायतका निकायमा परेको विषयमा निष्पक्ष छानबिन हुनुपर्ने उनले बताए। सुनारले तत्कालीन गृहमन्त्री, गृहसचिव र प्रहरी महानिरीक्षकलाई समेत जिम्मेवारीबाट अलग गरेर छानबिन गर्नुपर्ने माग गरे।
आरोप लागेका व्यक्ति पदमै रहँदा आफूविरुद्ध हुने छानबिनलाई प्रभावित पार्न सक्ने भन्दै उनले सम्भावित प्रमाण नष्ट हुन नदिन सम्बन्धित ठेकेदार र प्रहरी अधिकारीबीचको सम्पर्क तथा आर्थिक कारोबारसमेत अनुसन्धानको दायरामा ल्याउनुपर्ने बताए।
आवश्यक परे सम्बन्धित व्यक्तिका मोबाइल तथा अन्य प्रमाण नियन्त्रणमा लिएर फौजदारी कसुरको कोणबाट समेत अनुसन्धान गर्नुपर्ने उनको माग छ।
