काठमाडौं । सर्वोच्च अदालतमा एक महिनाको अवधिमा दोस्रोपटक आगलागी भएको छ । बुधबार बिहान करिब साढे ८ बजे मुद्दा फाँटमा आगलागी भएको हो ।
आगलागीबाट तीनवटा कम्प्युटरसहित केही महत्वपूर्ण कागजात, कुर्सी र टेबुल जलेका छन् । प्रारम्भिक जानकारीअनुसार विद्युत् सर्ट भएर आगलागी भएको हो । प्रहरी तथा दमकलको सहयोगमा आगो नियन्त्रणमा लिइएको प्रहरीले जनाएको छ ।
यसअघि भदौ १७ गते सर्वोच्च अदालतको अभिलेख शाखामा आगलागी भएको थियो । उक्त घटनाको अनुसन्धान जारी रहेकै अवस्थामा पुनः अदालतमा आगलागी भएको हो ।
मुद्दासँग सम्बन्धित महत्वपूर्ण कागजात तथा अभिलेख रहने संवेदनशील क्षेत्रमा छोटो अवधिमै दुईपटक आगलागी भएपछि अदालतको सुरक्षा व्यवस्थामाथि प्रश्न उठेको छ ।
गत भदौमा भएको जेनजी आन्दोलनका क्रममा सर्वोच्च अदालतको पुरानो भवनमा आगजनी भएको थियो । आगजनीपछि हाल नयाँ भवनबाट अदालतको सेवा सञ्चालन भइरहेको छ ।
प्रकाशित मिति: बुधबार, भदौ ३१, २०८३
