काठमाडौँ । प्रमुख प्रतिपक्ष दल नेकपा एमालेले संसदमा प्रधानमन्त्री पुष्पकमल दाहाल ‘प्रचण्ड’को कुरा सुन्ने भएको छ।
गत सोमबार एक कार्यक्रममा प्रधानमन्त्री प्रचण्डले बोलेको अभिव्यक्तिलाई लिएर आपत्ति जनाउँदै संघीय संसद्का दुवै सदन अवरुद्ध गर्दैआएको एमालेले संसदमा आफ्ना कुरा राख्ने र प्रधानमन्त्रीको स्पष्टीकरण सुन्ने निर्णय गरेको एमालेका प्रमुख सचेतक पदम गिरीले जानकारी दिए।
उनले भने, ‘एमालेले सुरुमा आफ्नो विषय राख्ने राख्छ। त्यसपछि प्रधानमन्त्रीले स्पष्ट पार्नुहुन्छ। उहाँले आत्मालोचनासहित संसद्लाई आश्वस्त पार्नुपर्छ। आश्वस्त नपारे अवरोध कायमै रहन्छ।’
सदनको अवरोध हटाउने विषयमा आज प्रमुख तीन दलका शीर्ष नेताहरूबीच छलफल भएको थियो। सिंहदरबारमा भएको बैठकमा प्रधानमन्त्री पुष्पकमल दाहाल प्रचण्ड, काँग्रेस सभापति शेरबहादुर देउवा र एमाले अध्यक्ष केपी ओली सहभागी थिए। प्रधानमन्त्रीको आग्रहमा १ बजे बोलाइएको प्रतिनिधिसभा बैठक ३ बजेलाई सारिएको छ।
प्रकाशित मिति: आइतबार, असार २४, २०८०
