काठमाडौँ । राष्ट्रिय स्वतन्त्र पार्टीका सांसद गणेश पराजुलीले नेपालमा हुने भ्रष्टाचारको जड सरकारी कर्मचारी शिक्षक राजनीतिक कार्यकर्ता बन्नु रहेको बताएका छन् ।
प्रतिनिधिसभाको सोमबारको बैठकमा आगामी आर्थिक वर्षको नीति तथा कार्यक्रममाथिको छलफलमा सहभागी हुँदै संरचनागत भ्रष्टाचारको अन्त्य गरिए सुशासन हुने उनको भनाइ छ ।
सांसद पराजुलीले कर्मचारीलाई र शिक्षकहरूलाई राजनीतिक दलप्रति नभई राष्ट्र र जनताप्रति जबाफदेही बन्न आग्रह गरेका छन् ।
राजनीति गर्ने मन भए कर्मचारी र शिक्षकबाट राजीनामा गरेर आउन पनि उनले चुनौती दिएका छन् । उनले भने, ‘सेवा प्रवाह र सुशासनका कुरा गर्दाखेरि सबैभन्दा बाधक संरचनाभित्र भएको भ्रष्टाचार हो । त्यसको मूल जड भनेको राष्ट्रसेवक कर्मचारी र शिक्षकहरू राजनीतिक कार्यकर्ता बनिदिनु भयो । त्यस कारण शीर्ष नेताहरूलाई अनुरोध गर्न चाहन्छु, देशले आज परिवर्तनका लागि बलिदान खोजेको छैन, योगदान खोजेको छ । त्यस कारण प्रत्येक राष्ट्रसेवक कर्मचारीलाई तपाईँहरू आफ्ना कार्यकर्ता बनाउने कोसिस नगरिदिनुस् कृपया । शिक्षकहरूलाई कार्यकर्ता बनाउने कोसिस नगरिइदिनुस् कृपया । संसद्को रोष्ट्रमबाट सम्पूर्ण राष्ट्रसेवक कर्मचारीलाई अनुरोध गर्न चाहन्छु तपाईँहरूले जागिर प्राप्त गर्नका लागि जुनसुकै अवस्था सिर्जना भयो, जुनसुकै राजनीतिक पार्टीको टिकट काट्नुपर्ने स्थिति सिर्जना भयो त्यसलाई बिर्सिदिनुस् । तपाईँहरू आज राष्ट्र सेवक हुनुहुन्छ, निर्धक्क भएर देश निर्माण गर्ने प्रक्रियामा सहभागी हुनुस् । कुनै पनि दलसँग जबाफदेही हुनु पर्दैन, जबाफदेही हुनुपर्छ भने यस देशका नागरिकसँग र राष्ट्रसँग । नेपाली जनताले आज नयाँ दल र नयाँ नेता खोजेको होइन, नेपाली जनताले खोजेको विकास हो, समृद्धि हो र सुशासन हो । यो स्थापित भएकै दलहरूले दिनुस्, हामी खुसी हुन्छौँ ।’
पुराना दलहरूले राम्रो काम नगरेकाले समयको बाध्यताले आज आफूहरू आउनुपरेको रास्वपा सांसद पराजुलीको भनाइ थियो ।
प्रकाशित मिति: सोमबार, जेठ ८, २०८०
