काठमाडौँ । तत्कालीन ऊर्जा मन्त्री एवं नेकपा एमालेका सचिव टोपबहादुर रायमाझी र उनका छोरा सन्दीप रायमाझीविरुद्ध पक्राउ पुर्जी जारी भएको छ । काठमाडौं प्रहरीले बुधबार जिल्ला अदालत काठमाडौँबाट रायमाझीका बाबुछोराविरुद्ध पक्राउ पुर्जी लिएको हो ।
नक्कली भुटानी शरणार्थी बनाएर नेपालीलाई अमेरिका लैजाने प्रकरणमा अनुसन्धानका क्रममा काठमाडौँ प्रहरी परिसरले उनीहरूविरुद्ध पक्राउ पुर्जी लिएको हो ।
प्रहरी अधिकारीका अनुसार बुधबार नै पक्राउ परेका तत्कालीन गृह सचिव एवं हाल उपराष्ट्रपतिको कार्यालयका सचिव टेकनारायण पाण्डेसँग लिइएको प्रारम्भिक बयानका आधारमा अनुसन्धानलाई अगाडि बढाउन रायमाझीका बाबुछोराविरुद्ध पक्राउ पुर्जी जारी भएको हो ।
भुटानी शरणार्थी बनाएर अमेरिका लैजाने भन्दै आठ सय ७५ जना नेपालीसँग १० देखि ५० लाखसम्म उठाउने गिरोहसँग राजनीतिक र प्रशासनिक नेतृत्वको साँठगाँठ रहेको खुलासासँगै अहिले यो प्रकरण चर्चामा छ । गिरोहमा तत्कालीन गृहमन्त्री थापाका सुरक्षा सल्लाहकार इन्द्रजित राई, उनका छोरा निरज, केशवप्रसाद दुलाल, सन्देश शर्मा, सानु भण्डारी, अशोक पोखरेल, सागर थुलुङ राई र टंक गुरुङ सक्रिय रहेको कागजातबाट पुष्टि भएसँगै प्रहरीले अनुसन्धानलाई तिव्र बनाउँदै आएको छ ।
प्रकाशित मिति: बुधबार, वैशाख २०, २०८०
