काठमाडौँ । तनहुँ-१ मा राष्ट्रिय स्वतन्त्र पार्टी (रास्वपा) का उम्मेदवार स्वर्णिम वाग्लेले आफ्ना प्रतिस्पर्धी भन्दा दोब्बर मतान्तरले अग्रता लिएका छन् ।
निर्वाचन आयोगका अनुसार करिब ७ हजार ५ सय मत गन्दा वाग्ले निकटम् प्रतिस्पर्धी काँग्रेस उम्मेदवार गोविन्द भट्टराईभन्दा दोब्बर बढी मतान्तरले अगाडि रहेका छन् ।
रास्वपाका वाग्लेले ४३०३ मत ल्याउँदा भट्टराईले १९३३ मत प्राप्त गरेका छन् । त्यस्तै तेस्रो स्थानमा रहेका एमाले उम्मेदवार सर्वेन्द्र खनालले ११९८ मत प्राप्त गरेका छन् । अहिलेसम्म भानु नगरपालिका वडा नम्बर ७, ८ र १०, आँबुखैरेनी गाउँपालिका वडा नम्बर १ र २ को मतगणना सकिएको छ ।
तनहुँ-१ मा आइतबार भएको उपनिर्वाचनमा ६३ हजार ७ सय ५७ मत खसेको निर्वाचन कार्यालयले जनाएको छ । २ दिनभित्र अन्तिम मत परिणाम सार्वजनिक गर्ने आयोगको तयारी छ ।
त्यस्तै बारा-२ र चितवन-२ मा भने सोमबार (आज) बिहानदेखि मात्र मतगणना सुरु हुने छ ।
प्रकाशित मिति: सोमबार, वैशाख ११, २०८०
