काठमाडौं । यस वर्षको हरितालिका तिजका अवसरमा पशुपतिनाथ मन्दिरमा बिहानैदेखि दर्शन गर्न आउने भक्तजनको भीड लागेको छ ।
हरितालिका तिजको व्रत बसेका महिलाको सहजताका लागि बिहान ३ बजेदेखि नै पशुपतिनाथ मन्दिरका चारवटै ढोका खोलिएको पशुपति क्षेत्र विकास कोषले जनाएको छ ।
कोषका सदस्य सचिव तीर्थ श्रेष्ठका अनुसार भक्तजनको भीड व्यवस्थापन तथा सहज दर्शनका लागि विभिन्न स्थानबाट आउने दर्शनार्थीका लागि छुट्टाछुट्टै प्रवेश र दर्शन मार्गको व्यवस्था गरिएको छ ।
मित्रपार्कतर्फबाट आउने दर्शनार्थीका लागि मित्रपार्क–उमाकुण्ड–दक्षिणामूर्ति–कैलाश बद्रीनरसिंहको भवन हुँदै वासुकीनाथको उत्तरतर्फको ढोकाबाट प्रवेश गराई मन्दिरको उत्तरतर्फको र्याम्पबाट दर्शन गराउने व्यवस्था गरिएको छ । दर्शनपछि पश्चिम ढोकाबाट बाहिरिने व्यवस्था मिलाइएको छ ।
त्यस्तै जयवागेश्वरीतर्फबाट आउने दर्शनार्थीका लागि दथुटोल, पाचा गणेश, अन्नपूर्णभण्डार हुँदै महास्नानघरअघिको आकासे पुलबाट भुवनेश्वरी, नासलचोक हुँदै शंकराचार्य मठअघिको आकासे पुलबाट मन्दिरको पश्चिमतर्फ रहेको काठको र्याम्पमा पुर्याई दर्शन गराउने व्यवस्था गरिएको छ ।
सिनामंगल तथा विमानस्थलतर्फबाट आउने दर्शनार्थीका लागि तिलगंगा पर्यटन काउन्टरसँगैको ढोकाबाट प्रवेश गराई राम मन्दिर, वाग्मती किनारा हुँदै आर्यघाटको पुलबाट ब्रह्मनाल र पूर्वढोकामा राखिएको र्याम्पमार्फत पूर्वी मुहारको दर्शन गराउने व्यवस्था गरिएको छ ।
पिंगलास्थानतर्फबाट आउने भक्तजनका लागि पिंगलास्थानको ढोकाबाट प्रवेश गराई चार शिवालय–पञ्चदेवल वृद्धाश्रम हुँदै अस्थायी आकासे पुलबाट मन्दिर प्रवेश गराउने व्यवस्था गरिएको छ । उनीहरूले चौँसट्ठी कोटीलिंगेश्वर हुँदै मन्दिरको दक्षिण मुहारको दर्शन गर्नेछन् ।
पशुपति क्षेत्रमा सुरक्षा व्यवस्थाका लागि चार हजार सुरक्षाकर्मी परिचालन गरिएको छ । त्यस्तै २४ वटा धार्मिक तथा सामाजिक संस्थाका ८५५ जना स्वयंसेवक पनि खटाइएको पशुपति क्षेत्र विकास कोषले जनाएको छ ।
_nJCneh38vu-1789366512.webp)
