वीरेन्द्रनगर । रुकुमपश्चिमको सानीभेरी गाउँपालिका–६, कोटगाउँबाट सिम्ली बजारतर्फ आउँदै गरेको बोलेरो जिप दुर्घटना हुँदा दुई जनाको घटनास्थलमै मृत्यु भएको छ।
आइतबार भएको दुर्घटनामा ११ जना घाइते भएका छन्। घाइतेमध्ये चार जनाको अवस्था गम्भीर रहेको प्रहरीले जनाएको छ। घाइतेहरूलाई तत्काल उद्धार गरी उपचारका लागि पठाइएको छ।
जिल्ला प्रहरी प्रमुख प्रहरी नायब उपरीक्षक (डीएसपी) वेदबहादुर पौडेलका अनुसार दुर्घटनामा मृत्यु हुने दुई जनाको पहिचान खुल्न सकेको छैन। प्रहरीले मृतकको पहिचान तथा घाइतेहरूको विवरण संकलन गरिरहेको छ।
दुर्घटना कसरी भयो भन्नेबारे खुलिसकेको छैन। घटनास्थल, सडक र जिपको अवस्थालगायतका विषयमा प्रहरीले प्रारम्भिक अनुसन्धान गरिरहेको जनाएको छ।
प्रकाशित मिति: आइतबार, भदौ २८, २०८३
