कर्णाली । मोटरसाइकलको ठक्करबाट सुर्खेतमा एक महिलाको मृत्यु भएको छ।
वीरेन्द्रनगर नगरपालिका–१०, बरिपाटीकी ५५ वर्षीया आशा बुढाको उपचारका क्रममा आइतबार बिहान मृत्यु भएको हो।
सुर्खेत जिल्ला प्रहरी कार्यालयका प्रहरी नायब उपरीक्षक कविन्द्रसिंह बोहोराका अनुसार सडकपेटीमा हिँडिरहेकी बुढालाई मोटरसाइकलले ठक्कर दिएको थियो। दुर्घटनामा गम्भीर घाइते भएकी उनलाई उपचारका लागि माया नर्सिङ होम लगिएको थियो।
त्यहाँबाट थप उपचारका लागि कर्णाली प्रदेश अस्पताल पुर्याइएकी बुढाको उपचारका क्रममा मृत्यु भएको प्रहरीले जनाएको छ।
प्रहरीले मोटरसाइकल र चालकलाई नियन्त्रणमा लिएर घटनाबारे थप अनुसन्धान गरिरहेको छ।
प्रकाशित मिति: आइतबार, भदौ २८, २०८३
