काठमाडौं । प्रतिनिधिसभाअन्तर्गतको शिक्षा, स्वास्थ्य तथा सूचना प्रविधि समितिले होल्डिङ सेन्टरमा रहेका दीर्घरोगी, ज्येष्ठ नागरिक, महिला तथा बालबालिकाका लागि घुम्ती स्वास्थ्य टोली परिचालन गर्न सरकारलाई निर्देशन दिएको छ।
सिंहदरबारमा शुक्रबार बसेको समिति बैठकले उनीहरूको प्रारम्भिक स्वास्थ्य परीक्षण, नियमित औषधिको निरन्तर आपूर्ति तथा जटिल बिरामीको समयमै उपचार र फलोअप सुनिश्चित गर्न स्वास्थ्य मन्त्रालयलाई निर्देशन दिएको हो।
समितिले सम्भावित महामारी तथा प्रकोपलाई ध्यानमा राख्दै जीवनजल, व्यक्तिगत सुरक्षा उपकरण, अत्यावश्यक औषधि र अन्य स्वास्थ्य सामग्री पर्याप्त मात्रामा भण्डारण गर्न पनि निर्देशन दिएको छ।
त्यस्तै, स्वच्छ खानेपानी, हात धुने व्यवस्था, भोजन, शौचालय तथा उचित फोहोर व्यवस्थापन सुनिश्चित गर्न जनस्वास्थ्य तथा वातावरणीय स्वास्थ्यकर्मी परिचालन गरी नियमित अनुगमन गर्न समितिले भनेको छ।
इपिडिमियोलोजी तथा रोग नियन्त्रण महाशाखाको द्रुत चेतावनी प्रणालीमार्फत नियमित निगरानी, तत्काल रिपोर्टिङ तथा र्यापिड रेस्पोन्स टिम परिचालन गरी सम्भावित प्रकोपको पहिचान र नियन्त्रण गर्न पनि निर्देशन दिइएको छ।
बाढीबाट क्षतिग्रस्त स्वास्थ्य संस्थाहरूको सेवा वैकल्पिक व्यवस्थाबाट सञ्चालन गर्दै प्राथमिकताका आधारमा समयबद्ध पुनर्निर्माण अघि बढाउन समितिले सरकारलाई निर्देशन दिएको छ।
बैठकले मृतकको सम्मानजनक व्यवस्थापन, पहिचान नभएका शवको वैज्ञानिक अभिलेखीकरण तथा डीएनए परीक्षण गरी परिवारलाई समयमै शव हस्तान्तरण गर्न प्रहरी, विधि विज्ञान प्रयोगशाला र स्वास्थ्य मन्त्रालयबीच प्रभावकारी समन्वय गर्न पनि भनेको छ।
बैठकमा स्वास्थ्य मन्त्रालयका सचिव डा. विकास देवकोटाले महामारी तथा सम्भावित रोगको प्रकोप नियन्त्रणका लागि सातवटा टोली फिल्डमा परिचालन गरिएको जानकारी दिए। उनका अनुसार झाडापखाला तथा हैजाविरुद्ध नुवाकोटमा ८० हजार ५२३ डोज र रसुवामा २१ हजार ६०० डोज गरी एक लाखभन्दा बढी डोज पठाइसकिएको छ।
प्रकाशित मिति: शुक्रबार, भदौ २६, २०८३
