काठमाडौं । रसुवास्थित त्रिशूली–३ ‘ए’ जलविद्युत् आयोजनाको सुरुङभित्र फसेका दुई जनाको नेपाली सेना र सशस्त्र प्रहरीको संयुक्त टोलीले जीवितै उद्धार गरेको छ।
शुक्रबार (भदौ १९) बिहान उद्धार गरिएका ३० वर्षीय सञ्जय साह र ४५ वर्षीय कबीर महर्जनलाई उपचारका लागि हेलिकोप्टरमार्फत काठमाडौं पठाइएको ऊर्जा, जलस्रोत तथा सिँचाइमन्त्री विराजभक्त श्रेष्ठको सचिवालयले जनाएको छ।
उद्धार गरिएकामध्ये सप्तरीका साह मेकानिकल फोरम्यान र काठमाडौंका महर्जन मेकानिकल सुपरभाइजरका रूपमा आयोजनामा कार्यरत थिए।
भोटेकोसी नदीमा आएको विनाशकारी बाढीपछि उनीहरू सुरुङभित्र फसेका थिए। बाढी आएको १०औँ दिनमा नेपाली सेना र सशस्त्र प्रहरी बल नेपालको संयुक्त उद्धार टोलीले उनीहरूलाई सकुशल बाहिर निकालेको हो।
सशस्त्र प्रहरीले उद्धारपछि दुवै जनालाई आवश्यक उपचारका लागि हेलिकोप्टरबाट काठमाडौं पठाइएको जनाएको छ।
६० मेगावाट क्षमताको त्रिशूली–३ ‘ए’ जलविद्युत् आयोजना भदौ १० गते भोटेकोसी नदीमा आएको भीषण बाढीबाट ठूलो क्षति पुगेको छ। आयोजनाका अनुसार बाढीपछि त्यहाँ ४२ जना कर्मचारी तथा कामदार फसेका थिए।
प्रकाशित मिति: शुक्रबार, भदौ १९, २०८३
