काठमाडौं । सर्वोच्च अदालतको नयाँ भवनमा बुधबार (भदौ १७) राति भएको आगलागीबारे विभिन्न कोणबाट छानबिन सुरु भएको छ ।
नयाँ भवनको भुइँतलामा भएको आगलागीबाट केही कागजपत्र तथा मिसिल जलेका छन् । घटनाबारे नेपाल प्रहरीको अपराध अनुसन्धान शाखा र सर्वोच्च प्रशासनले छुट्टाछुट्टै अनुसन्धान थालेका हुन् ।
आगलागीको सूचना प्राप्त भएपछि प्रहरी टोली सर्वोच्च अदालत भवनको भुइँतलास्थित हलमा पुगेर घटनास्थलको मुचुल्का उठाउनुका साथै आवश्यक विवरण संकलन गरेको छ । फरेन्सिक विज्ञ टोलीले समेत घटनास्थलमा पुगेर अनुसन्धानका लागि विवरण संकलन गरेको छ ।
सर्वोच्च अदालतका प्रवक्ता अर्जुन कोइरालाका अनुसार आगलागी अवाञ्छित गतिविधिका कारण भएको हो वा विद्युत् सर्ट भएर भएको हो भन्ने विषयमा अनुसन्धान भइरहेको छ ।
“अवाञ्छित गतिविधिका कारण हो वा विद्युत् सर्ट भएर घटना भएको भन्ने विषयमा छानबिनपछि तथ्य आउनेछ,” उनले भने, “नजिकै पावर सर्किट पनि जलेका कारण त्यही नै हो कि जस्तो पनि देखिन्छ । के कसरी भएको हो भनेर विभिन्न कोणबाट अनुसन्धान हुँदै छ।”
आगलागीको जानकारी पाएपछि सुरक्षाकर्मीको सहयोगमा तत्काल नियन्त्रणमा लिइएको थियो । घटनाबाट जलेका मिसिल तथा कागजपत्रको विवरणसमेत संकलन भइरहेको छ ।
प्रकाशित मिति: बिहीबार, भदौ १८, २०८३
-1788432025.jpg)